Домра дорҕооно доҕуһуоллаах
Издательский дом Редакция Подписка
Погода в Якутске: . -40 oC

Балаҕан ыйын 30 күнүгэр С.А. Зверев-Кыыл Уола аатынан СӨ Үҥкүү национальнай тыйаатыра 43-с театральнай сезонун домра дорҕооно доҕуһуоллаах арыйар.

Балаҕан ыйын 30 күнүгэр С.А. Зверев-Кыыл Уола аатынан СӨ Үҥкүү национальнай тыйаатыра 43-с театральнай сезонун домра дорҕооно доҕуһуоллаах арыйар.

Быйылгы сезон аһыллыыта Муусука норуоттар икки ардыларынааҕы күнүн көрсө ыытыллар буолан, СӨ култууратын туйгуна, Үҥкүү тыйаатырын национальнай үстүрүмүөннэрин оркестрын артыыһа Инна Скрыбыкина сольнай кэнсиэринэн саҕаланар.

домра афиша

Оркестры (дирижер -- СӨ култууратын туйгуна Анюта Иванова) сэргэ  “J′OL” аныгы муусука ансаамбыла (салайааччы -- СӨ култууратын туйгуна Дмитрий Винокуров) кыттыаҕа.  Норуоттар икки ардыларынааҕы куонкурус дипломана Александр Карманов, импровизатор хомусчут Василена Шарина, СӨ култууратын туйгуннара Мария Коротова, Максим Бордонскай, Афанасий Федоров, Владимир Боярскай киэһэни киэргэтиэхтэрэ.

Бырагырааматын көрдөххө, саха мелодистарын ырыаларыттан саҕалаан, аан дойду биллэр композитордарын айымньыларыгар тиийэ толоруохтара.

домра концерт

Учуутала умсугутан

Бу долгутуулаах күн иннинэ Инна Скрыбыкинаны (Колтовскаяны)  кытары кэпсэттибит.

--Мин Бүлүүттэн төрүттээхпин. Бүлүү музыкальнай оскуолатыгар 1997 сыллаахха 8 сааспар киирбитим. Онно эбээм Анастасия Степановна Колтовская харабыллыыра. Хас биирдии оҕону, үлэһити үөрэ-көтө көрсөр, атаарар этэ. Онон мин харахпар кини саамай тутаах үлэһит курдук буолааччы.

Фортепианоҕа уһуйуллар баҕалааҕым. Ол эрээри балалайка уонна домра эрэ салааларыгар миэстэ баара. Балалайканы сирэн, домраны талбытым.

домра 9 портрет

Домра диэн казахтар домбраларыттан атын, нуучча норуодунай үстүрүмүөнэ буолар. Үс-түөрт устурууналаах.

Бастаан оччо сэҥээрбэтэҕим. Тарбаххынан баттыырга олус ыарахана, ыарыылааҕа. Аны күнү быһа мэниктээбэккэ олоруохха наада. Ол эрээри Марта Анатольевна Тоноева үчүгэй учуутал  буолан, кырачаан бэйэбин умсугуппута, дьүрүскэн дьикти эйгэтин арыйбыта.

Биэс сыл музыкальнай оскуола кууруһун толору ааһан баран, эбии үс сыл дьарыктаммытым. Домраны олус сөбүлээн, тохсус кылаас кэнниттэн Дьокуускайдааҕы М.Н. Жирков аатынан музыкальнай колледж норуодунай отделениетыгар домра салаатыгар туттарсан киирбитим.

Сахабыт Сиригэр биллэр домрист, бу салааҕа үлэлиир дьон бары ытыктыыр киһибит Людмила Петровна Киселеваҕа үөрэммитим. Үөрэхпин кыһыл дипломнаах 2009 сыллаахха бүтэрбитим.

Эдэр исписэлиис үлэбин Сунтаар улууһуттан саҕалаабытым. Биир сыл үлэлээн баран, үөрэхпин үрдэтинээри, Култуура уонна ускуустуба Аартыкатааҕы судаарыстыбаннай институтугар киирбитим. Онно эмиэ Людмила Петровна кылааһыгар түбэспитим. Бэһис кууруска учууталым Екатерина Юрьевна Бутырина буолбута. Баҕалаах үөрэхпин кыһыл дипломнаах 2015 сыллаахха бүтэрбитим.

домра репетиция

Өйдөһөн, өйөһөн

--Мин икки оҕолоох ийэбин. Улахан кыыһым быйыл маҥнайгы кылааска киирдэ, кыра кыыһым уһуйаан иитиллээччитэ. Култуура үлэһитэ буолан, үлэм чааһа болдьоҕо суох. Испэктээктэр, кэнсиэрдэр өрөбүллэргэ, бырааһынньыктарга, репетициялар киэһэ хойукка диэри буолаллар, ол быыһыгар гастроллар бааллар. Бириэмэ тиийбэт курдук. Манна кэргэним Иван Иванович Скрыбыкин күүстээх дурда-хахха буолар, оҕолору, дьиэни-уоту көрөн абырыыр. Идэтинэн физкультура учуутала, педколледжы бүтэрбитэ. Ол эрээри миигин өйөөн, көмөлөһөн, билигин бэйэтэ бэйэтигэр үлэлиир (самозанятай).

домра семья

“Музыкант оҕото музыкант” буолуохтаах диэн сыыһа өйдөбүл дии саныыбын. Муусуканы ис сүрэхтэн таптаатаххына эрэ бу эйгэҕэ үлэҥ тахсыылаах буолар. Мин оҕолорум билигин кыралар, быһаарына иликтэр. Мин даҕаны күүспүнэн ыххайбаппын, бэйэлэрэ таллахтарына барыахтара.

домра с дочками

Кыһаллан үлэлээтэххэ

--Үҥкүү тыйаатырын кытта 2011 сылтан, маҥнайгы куурус устудьуоҥката эрдэхпинэ, үлэлэһэн саҕалаабытым. Ол кэмҥэ сүрүн үлэһиттэрэ оҕолонон олорор буолан, миигин быстах кэмҥэ солбук быһыытынан ылбыттара.  Үлэҕэ Анюта Николаевна ыҥырбыта, киниэхэ олус махтанабын. Оркестр сүрүн дирижера -- СӨ ускуустубатын үтүөлээх диэйэтэлэ Николай Павлович Петров.

Кыахпын ууран туран кыһаллан үлэлээн саҕалаабытым. Ол иһин да буолуо, 2014 сылга толору ыстаакка ылыллан, артыыс буолбутум.

Ол кэмтэн номнуо 12 сыл ааста. Үлэбин билигин өссө күүскэ сөбүлүүбүн, астынабын.

Вера Черноградская, Үҥкүү тыйаатырын сүрүн исписэлииһэ:

-         Инна Александровна -- олус инициативалаах, киэҥ билиилээх, үлэтигэр ураты бэриниилээх үлэһиппит. Муусуканы, ноталары дьиҥ-чахчы баһылаабыт исписэлиис. Ол даҕаны иһин буолуо, иккис сылын кини биһиги тыйаатырбыт бибилэтиэкэтин салайааччытынан ананан, айымньылаахтык үлэлиир. Бибилэтиэкэ олус баай. Билиҥҥитэ ноталаах 700-800 матырыйаал харалла сытар. Ол быыһыгар урукку  композитордарбыт чараас, былыргы кумааҕыга илиинэн суруйбут партитуралара баар. Бу -- история кэрчиктэрэ, олус сыаналаах кэрэһиттэр. Маны олус харыстаан, ноталары кумааҕыттан электроннай көрүҥҥэ Инна көһөрөр, цифровой варианын киэҥ араҥаҕа тарҕатар. Кэлин барыта табыллан истэҕинэ, мусуой тэрийэн, дьоҥҥо-сэргэҕэ көрдөрөр былааннаах.

Быйылгы сезон аһыллыытын олус долгуйа күүтэбит. Эһиил оркестр 30 сылын көрсөрүгэр маҥнайгы улахан хардыы.

домра 3

Баҕа санаа туолуута

--2021 сыллаахха бииргэ үлэлиир кэллиэгэ кыыһым Мария Коротовалыын “Весенний каприс” (каприс -- музыкальное произведение свободной формы, отличающееся живостью, неожиданными и оригинальными оборотами) диэн сольнай кэнсиэри тэрийбиппит. Дьон олус сөбүлээн, сыанаҕа иккитэ турбута. Олус истиҥник ааспыта.

домра 2 подруги

Онтон ыла бэйэм айар кэнсиэрбин туруоруохпун баҕарбытым. Хааччахтааһын бүтэн, үлэҕэ толору састаабынан тахсан, ол ыра санаам, дьэ, туолар буолла -- балаҕан ыйын 30 күнүгэр тыйаатыр камернай саалатыгар сезону айар биэчэрбинэн арыйар чиэскэ тигистим.

Театральнай сезон, үгэс быһыытынан, испэктээгинэн арыллааччы. Сольнай кэнсиэринэн бу маҥнайгытын саҕаланар. Репертуарбын уһуннук толкуйдаабытым. Кэлэн көрөөрүҥ диэн ыҥырабын.

домра 7

Саҥа сүүрээн

--Тыйаатырбыт оркестрын иһинэн хас даҕаны ансаамбыл үлэлиир. Мин “J′OL” ансаамбылга дьарыктанабын. Манна аныгы муусука сүүрээннэрин тэтимин доҕуһуоллуубут. Киэҥ эйгэҕэ муусука кэрэтин билиһиннэрэр сыаллаах оскуолаларынан, уһуйааннарынан, санаторийдарынан, о.д.а. уопсастыбаннай тэрилтэлэринэн сылдьан кэнсиэрдиибит. Биһигини ыҥыраллар, оччотугар үөрүүнэн сөбүлэһэбит. 2018 сыллаахха тэриллибит ансаамбылбыт эһиил номнуо 5 сылын туолуохтаах.

Эмиэ оркестр иһинэн “Кыл Саха” (салайааччы Анна Томская) ансаамбыл үлэлиир. Кинилэри кытары өрүү бииргэ сылдьабыт.

 домра дьол 2

Истээччилэрбин үөрдэ туруом

--Киһи киһи муусукаҕа кэлэрэ араас төрүөттээх. Ким эрэ биир эрэ жанры ордорор, ким эрэ барытыгар уратытын булан истэр. Маныаха сүрүнэ – киһи ис туруга.

Муусуканы кытары миэхэ таптыыр кэргэним, өрүү үөрдэр кырачаан оҕолорум, дуоһуйар үлэм баара – мин тус дьолум. Миигин кынаттыыр, муза буолар дьонум баар буолан, үлэм тахсыылаах, былаан киэҥ. Барыта туолан, истээччилэрбин үөрдэ туруом диэн саныыбын.

 домра гастроли


Анюта Николаевна Иванова, дирижер:

-         Инна биһиги кэлэктииппит биир тутаах үлэһитэ буолар. Былырыын СӨ култууратын туйгуна ааты ылбыта. Кини сыралаах үлэтин түмүгэ -- барыбыт үөрүүтэ. Кыралаан оркестрга инструментовкалары оҥорон саҕалаан эрэр. Эдэр киһи буолан, олус сэргэх, аныгылыы көрүүлээх бырайыактары толкуйдаан үлэҕэ киллэрэр. Холобур, бу кыһын “Хомус Кыыс” диэн “J’OL” бөлөх доҕуһуоллаах музыкальнай остуоруйа олоххо киириэхтээх. Бу Инна Скрыбыкина, Мария Коротова уонна мин бырайыакпыт буолар, Василена Шарина хомус туһунан остуоруйатын матыыптарынан. Онно эмиэ улахан үлэ бара турар, либреттота, муусука талааһына эҥин.

  “J′OL” ансаамбыл тэриллибитэ биэс сылын эһиил саҥа туолар эрээри, дьоҥҥо-сэргэҕэ киэҥник биллэр.  Онон кыыспытыгар былааннара туоларыгар, сезону бэркэ арыйарыгар баҕарабыт.

домра 1

домра 6

домра нвк

домра сосновый бор

  • 4
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением

Другие новости