Нэһилиэк дьокутааттарын Сэбиэтин мунньаҕын иилээн-саҕалаан оскуола оҕолоро ыыттылар.
"Модель наслежного Совета" дьылабыай оонньуу иккис сылын тэриллэр. Мунньахха көрүллүбүт сүрүн боппуруостар нэһилиэк сайдыытыгар уонна тупсарыытыгар туһуланна. Бу күн дьокутааттар уонна оҕолор нэһилиэк сайыннарыытыгар, тас көстүүтүн тупсарыытыгар суолталаах этиилэри киллэрдилэр. Эбии сэргэх көстүүнэн, оҕолор биирдиилээн эрэ буолбакка, бөлөҕүнэн кыттыннылар. Көрүллүбүт боппуруостар дьиҥ олоххо сыһыаннаах, ыччат хараҕын көрүүлэринэн этиллибит буоланнар, олус итэҕэтиилээхтэр. Холобур, оптуобус тохтобулларыгар төлөппүөн, ноутбук ииттэрэри хааччыйыы, саҥа тутуллубут элбэх кыбартыыралаах дьиэлэргэ ыты күүлэйдэтэр былаһааккалары арыйыы, дьон сылдьар тротуардары доруобуйаларынан хааччахтаах дьоҥҥо табыгастаах буоларын ситиһии, гаас ситимин хаһыллыбыт сирдэрин чөлүгэр түһэрии, кытаанах тобохтору харайар полигону күрүөлээһин уо.д.а. Ити курдук, нэһилиэк олоҕор-дьаһаҕар дьиҥ суолталаах, инникитин туһалаах кыһалҕалары көтөхтүлэр.
Эдэр парламентарийдар дьокутааттарга утарынан ыйытыктары биэрэн, киирбит этиилэри сиһилии тохтоон ырыппыттара сэҥээртэ. Оҕолор эрдэттэн бэлэмнэнэн, этиилэрин сөпкө туруорсаллара олоххо бэлэмнээх ҕуолууларын туоһулаата. Этэргэ дылы, дьиҥнээх "парламентердар" оруолларыгар киирэн, бу күн дьаныардаахтык үлэлээтилэр.
Дьулустаан Алексеев, оонньуу тэрийээччитэ:
- "Модель Наслежного совета депутатов" дьыалабыай оонньууну иккис сылын тэрийэбит. Оонньуу кэмигэр оҕолор нэһилиэк дьокутаатын үлэтин-хамнаһын оруолун боруобаланан көрөллөр. Бырайыак хас биирдии оҕо толкуйдуур, саҥарар-иҥэрэр кыаҕын сайыннарарга туһуланар. Сыала - билиҥҥи олоххо оҕо көрүүлэрин билиһиннэрии. Оҕо төрөөбүт дойдута инникитин хайдах буоларын баҕарарын, этиилэрин сөпкө тиэрдэрин, атын дьон санааларыгар хайдах көмүскүүрүн кэтээн көрөөрү туһуланна. Түмүккэ оҕолор хайҕал суруктары туттулар. Бастакы миэстэ Айсаар Николаев, иккис - Елена Ефремова, үһүс - Володя Попов буоллулар.
Ксения Васильева, "Бэрдьигэстээх нэһилиэгэ" МТ баһылыгын солбуйааччыта:
- Бырайыак быйыл олус сэргэхтик ааста. Оҕолор мунньахха этиммит санаалара олоххо тус көрүүлэриттэн этиллибитэ кырдьыктаах. Биһиэхэ, дьаһалта үлэһиттэригэр, тэрээһин туһалаах, наадалаах. Оонньуу кэмигэр ылыныллыбыт быһаарыылар инникитин нэһилиэк дьокутааттарын уочараттаах мунньаҕар мэктиэ быһыытынан киириэхтэрэ.
Василий Тимофеев
-
0
-
0
-
0
-
0
-
0
-
0
