Үс күн өрөбүл
Үүммүт үлэ нэдиэлэтэ кылгас – түөрт үлэ күннээх уонна үс өрөбүллээх. Сэтинньи 4 күнүгэр - Сомоҕолоһуу бырааһынньыга. РФ Үлэҕэ Кодексатынан сэтинньи 4 күнэ бырааһынньык күнүнэн ааҕыллар. Ити курдук, нэдиэлэҕэ биэс үлэ күннээх үлэһиттэр, сэтинньи ый 4-6 күннэригэр өрүөхтэрэ. Маны таһынан, сэтинньи 3 күнүгэр, бырааһынньык иннинээҕи үлэ күнүгэр, биир чаас үлэ чааһа кылгыыр.
Күһүҥҥү байыаннай сулууспаҕа ыҥырыы
Уочараттаах ыҥырыы хампаанньата сэтинньи 1 күнүттэн саҕаланыа. Байыаннай сулууспаҕа 120 тыһыынча киһи барара былааннанар. Бу былырыыҥҥы күһүҥҥү хомууртан 7,5 тыһыынча киһинэн аҕыйах. Сокуон быһыытынан, байыаннай сулууспаҕа 18-27 саастаахтар ыҥыраллаллар, байыаннай учуокка турар эбээһинэстээх эрээри, бэлиэтэммэтэхтэр, итиэннэ саппааска сылдьар буолбатах дьон ыҥырыллаллар. Санатар буоллахха, быстах байыаннай хомуурунан сибээстээн, алтынньы ыйыгар ыытыллыахтаах уочараттаах ыҥырыы хампаанньата сэтинньигэ көһөрүллүбүтэ.
Быстах байыаннай хомуурга ыҥырыллыбыттарга 195 тыһ.солк.
Мэктиэлэммит алын төлөбүр муҥутуур кээмэйэ 195 тыһ. солк. тэҥнэһэр. Маннык кээмэйдээх сууманы быстах байыаннай хомуурга ыҥырыллыбыттарга аныырга, дойду Бэрэсидьиэнэ Владимир Путин РФ Үп министэристибэтигэр сорудахтаабыта. Оборона уонна Үп министиэристибэлэрэ сэтинньи 1 күнүттэн ирдэнэр кэмэйдээх төлөбүрү, быстах байыаннай хомуурунан ыҥырыллыбыттар байыаннай чаас испииһэгэр бэлиэтэммит уонна бэлэмнэнии үөрэнэр кэмиттэн ааҕыахтара. РФ бырабыыталыстыбата бу сыалга сөптөөх үбү бүддьүөккэ көрүммүтэ.
Пенсия төлөнөр болдьоҕо уларыйар
Ый бастакы нэдиэлэтэ үс хонук өрөбүллээҕинэн, пенсия ылыахтаах аҕам саастаах дьоҥҥо пенсия төлөнөр болдьоҕо уларыйар. Федеральнай сокуонунан өрөбүл уонна бырааһынньык күннэригэр пенсия тиэрдиллибэт. Итинэн сибээстээн, анаммыт пенсия харчыта болдьоҕун иннинэ, эрдэ түһүөҕэ. Пенсия болдьоҕо уларыйарын туһунан Пенсионнай пуонда саайтыгар киирэн сиһилии билсиэххэ сөп.
Нолуок уонна страховой усунуос
Биирдиилээн дьон тырааныспар, сир, хамсаабат баай-дуол 2021 сыллааҕы нолуоктарын бэрэбиэркэлииргэ уонна төлүүргэ ый бэриллэр. Нолуок төлүүр туһунан иһитиннэриилэри тиэрдии, бүгүн, алтынньы 31 күнүгэр түмүктэннэр. Өскөтүн, сэтинньи 1 күнүгэр диэри нолуок төлөбүрүн туһунан иһитиннэрии суругу туппатаххына, "Личный кабинет" эбэтэр "Обратиться в ФНС России "сервис нөҥүө ыйытык суруйан чуолкайдыаххытын сөп. Санаттахха, хойутаабакка бу сыл ахсынньы 1 күнүгэр диэри нолуок бары көрүҥэ төлөнүөхтээх.
Мобилизацияланааччы иэһэ
Кирэдьиит биэрэр тэрилтэлэр Арассыыйатааҕы налоговай уорганыттан мобилизацияланааччы иэһин туһунан дааннайдары ылар кыахтаналлар. Маннык уларыйыы бу сыл сэтинньи 23 күнүттэн күүһүгэр киириэҕэ.
-
0
-
0
-
0
-
0
-
0
-
0
