Үөрүүлээх түгэҥҥэ нэһилиэк баһылыга Иван Атласов, тыа хаһаайыстыбатын специалиһа Алексей Аргунов, нэһилиэк кырдьаҕастара, тыа хаһаайыстыбатынан дьарыктанар, сүөһү ииттэр олохтоохтор, кэллиэгэлэрэ - култуура үлэһиттэрэ кытыннылар. Сахалыы сиэр-туом толорулунна, Иван Иванович уонна хаһаайыстыба баһылыга Сидор Сидоров кыһыл лиэнтэни быстылар. Элбэх үтүө тыл, баҕа санаа этилиннэ. Бу туһунан “Хотугу кыым” хаһыат иһитиннэрэр.
Сидоровтар хаһаайыстыбаларыгар 13 сүөһүлээхтэриттэн 6-та ыанньыктар эбит. Быйыл 21 туонна оттоохтор. 30-ча туонна отунан сыл тахсабыт дииллэр.
Сидор Семенович маннык кэпсээтэ: “17 сүөһүттэн түөрдүн идэһэлииргэ күһэлиннибит. Быйыл ардахтаах дьыл буолан, ходуһа барыта ууга барбыта. 1-2 күн эрэ тура-тура, наар ардах. Онон от кыайтарбата. 21 туонна оту бэлэмнэммиппит, 6 туонна бүттэ.
Саҥа хотон 7,5 х 12 иэннээх. Улахан хотон. Бырайыагын Хатастан аймахпыт, тутуунан дьарыктанар Егор Жирков оҥорбута, кэлэн тутта. Саас эрдэ мас бэлэмнэнэн, бэс ыйыгар пилорамаҕа лапедтатан, акылаатын түһэрбиппит. Онтон балаҕан ыйын ортотугар тутуутун саҕалаан бүтэрдибит.
1 мөл. 300 тыһ. кирэдьиит ылан, Дьокуускайга олунньу ыйга матырыйаалын барытын ылыммытым. Биир массыынаҕа баппакка, прицепкэ эбии тиэйбиппит. Инньэ гынан, эбии эмиэ үп наада буолбута. Ити кэнниттэн сыана эмискэ үрдээбитэ. Онон, хата, кыл-мүччү дьаһаммыппыт. Тиэйэр ороскуоппутугар олохтоох дьаһалта – баһылыкпыт Иван Атласов көмөлөспүтэ.
Бөһүөлэктэн 2 көстөөх сиргэ сайылыктаахпыт. Оттуур ходуһабыт онно. Сарсын, дьэ, сүөһүлэрбитин саҥа хотоҥҥо көһөрөн аҕалыахтаахпыт”, - диэн үөрүүтүн үллэһиннэ.
Сидоровтар элбэх оҕолоох дьиэ кэргэн. 5 оҕолоохтор, сиэннэрдээхтэр. 3 оҕо ыал, Любалара устудьуон, кыралара Эмма 8-с кылааска үөрэнэр.
Кэргэнинээн Надеждалыын култуура институтун бүтэрэн кэлиэхтэриттэн сүөһүгэ сыстан, төрөппүттэригэр көмөлөһөн, 2005 сыллаахтан бэйэлэрэ туспа хаһаайыстыбаламмыттар. Онтон ыла биир да сыл илиилэрин араарбакка сүөһү ииттэллэр. Биллэн турар, иккиэн сүрүн үлэлээх ыалга ыарахаттардаах да буоллар, сибиэһэй ас, кыра да буоллар эбии дохуот, оҕолорго дьарык диэн сүөһүлэрин эспэккэ кэллилэр. Эһэ сыспыт да кэмнэрэ баара... Онуоха кырдьаҕас киһи, айылҕалаах Александра Константиновна Чиркова кэлэ сылдьан сүбэлээн, туттуммуттара. Билигин сөпкө сүбэлээбит диэн махтаналлар. Сүөһүлээх буолан сарсыҥҥы күҥҥэ эрэллээхпит дииллэр.
Ол да буоллар хаһаайыстыба баһылыга түмүгэр хомолтотун эттэ:
- Билигин ый аайы 30 тыһ. солк. кирэдьиит төлөбүрэ. Кэргэмминээн иккиэн сүрүн үлэлээх буолан эрэ төлөһөбүт. Хоту сиргэ сүөһү иитэр ыарахаттара элбэх. Уматык сыаната ыарахан. От-мас тиэйтэриитэ ороскуот улахан. Тыа хаһаайыстыбатын өйүүр бырагыраамма бөҕө баар. «Агростартапка», атын да бырагырааммаларга кыттан көрдүбүт да, туох да өйөбүлгэ тиксибэтибит.
-
0
-
0
-
0
-
0
-
0
-
0
