Быыбар кэмигэр Саха Сиригэр 35 территориальнай, 810 участковай быыбардыыр хамыыһыйалар үлэлээбиттэр, ол иһигэр 19 быыбардааччылар кылгас болдьохтоох кэмҥэ олорор сирдэригэр (7 баахтабай бөһүөлэк, 3 полярнай станция, 4 мэдиссиинэ тэрилтэтэ, 1 СИЗО).
Бу быыбардарга саҥа киирии - Түөрт экстерриториальнай быыбардыыр учаастактары тэрийии буолла. Манна быстах байыаннай дьайыы кыттыылахтара куоластыыр бырааптарын туһаннылар. Бу учаастактарга атырдьах ыйын 30 күнүттэн балаҕан ыйын 5 күнүгэр диэри эрдэ куоластааһын ыытылынна.
Ыарахан суоллаах-иистээх уонна ыраах сирдэргэ эрдэ куоластааһыны ыытыы 26 улууска ыытылынна. Манна кыттыыны 4621 киһи ылла.
Электроннай быыбардыыр сириэстибэлэр олоххо киириилэрэ биллэн эрэрэ эмиэ бу быыбарга көһүннэ. Ол курдук, 7 тыһ. киһи участковай быыбардыыр хамыыһыйаларынан, 12097 киһи Госуслуганнан, 1658 киһи территориальнай быыбардыыр хамыыһыйаларынан, 1323 киһи “Мои документы” офис нөҥүө быыбардыыр сирдэрин пропискаларынан буолбакка, тустаах кэмҥэ ханна баалларынан уларыппыттар.
Түмүктэргэ тохтуур буоллахха, Ил Дархан Айсен Николаевка 75,77% куоластааччы куолаһын биэрдэ. Виктор Губаревка 10,41%, Гаврил Парахиҥҥа 5,69%, Игорь Борисовка 5,20%.
Киин быыбардыыр хамыыһыйа Ил Түмэн дьокутааттарын быыбарыгар боротокуоллары 100% көрдө.
“Биир ньыгыл Арассыыйа” баартыйа хаһааҥҥытааҕар даҕаны үрдүк көрдөрүүлэх. Ол курдук, Ил Түмэн сэттис ыҥырыылаах мунньаҕар баартыйа 54,36% куолаһы ылла. Улуус баһылыгын быыбардарыгар 56%, Дьокуускай куорат дууматыгар 47%, нэһилиэктэр баһылыктарын быыбарыгар 74%.
Иккис миэстэҕэ тахсыбыт “Новые люди” баартыйа норуот дьокутааттарын быыбарыгар 14,17% ылан Ил Түмэҥҥэ киирдэ.
Үһүс миэстэҕэ КПРФ — 13,16%, “Сиэрдээх Арассыыйа - Кырдьык туһугар” 9,39% куолас, ЛДПР — 5,39%. Оттон «Родина» баартыйа 1,02% куолаһы ылла, онон барылаамаҥҥа киирбэтэ.
Ил Дархан, Ил Түмэн, Дьокуускай куорат дууматын дьокутааттарын тэҥэ, 9 оройуоҥҥа улуус баһылыктарын (Үөһээ Халыма, Горнай, Кэбээйи, Нам, Таатта, Уус Алдан, Уус Майа, Усуйаана, Эбээн Бытантай) таллылар. 22 оройуон бэрэстэбиитэллээх уорганнарын дьокутааттарын, 23 нэһилиэк баһылыктарын, 7 нэһилиэк дьокутааттарын таллылар.
Евгений Федоров бэлиэтээбитинэн, билигин Дьокуускай куорат Дууматын дьокутааттарыгар куолас ааҕааһына салҕанар. Киин быыбардыыр хамыыһыйа Официальнай быһаарыылаары бу күннэргэ бигэргэтиэ.
Түмүккэ эттэххэ, быйыл быыбарга куоластааччы 48,41% кытынна. Бу ааспыт быыбардардааҕар намыһах. Ол курдук, 2014 сыллаахха 52,75%, 2018 сыллаахха 50,70%.
-
2
-
0
-
0
-
0
-
0
-
0
