Бу туһунан сиһилии дириэктэр Зинаида Максимова кэпсиир:
– Биһиги кииммит уустук балаһыанньаҕа түбэспит оҕолору өйүүр пуонда инновационнай социальнай бырайыактарын куонкуруһугар кыайыылаах тахсан, бы сыл алтынньытыттан “Ураты оҕолорго – аһаҕас кыахтары” («Особым семьям – открытые возможности») бырайыак чэрчитинэн Дьиэтээҕи микрореабилитационнай киин үлэтин саҕалаатыбыт. Манна Дьокуускай куоракка олорор 3-тэн 18 саастарыгар диэри сайдыыларыгар элбэх кэһиллиилээх инбэлиит оҕолорго дьиэлэригэр тиийэн бэйэбит өҥөбүтүн оҥоробут.
Куорат социальнай харалтатын салаатын кытта тэҥҥэ үлэлэһэн, биһиги өҥөбүтүгэр наадыйар түөрт ыалы булан, маҥнай невролог-быраас, эмтиир физкултуура инструктора, педагог-психолог, логопед учуутал кинилэргэ сырыттыллар. Кинилэр төрөппүттэри кытта кэпсэтэн, ирдэнэр докумуоннары толорон, оҕолорго диагностика оҥорбуттара. Бу докумуоннарга олоҕуран Кииҥҥэ консилиум тэриллэн, испэсэлиистэр хас биирдии оҕоҕо хайдах реабилитациялыыр тэрээһиннэр ыытыллыахтарын сөбүн быһаарсан, испэсэлиистэр дьарыктарыгар график бигэргэммитэ.
Ааспыт нэдиэлэттэн Киин испэсэлиистэрэ, дефектолог, педагог-психолог, эмтиир физкультура инструктора, массажист оҕолорго дьиэлэригэр дьарыктары оҥорон саҕалаатылар. Манна улахан болҕомто төрөппүтэргэ ууруллар. Кинилэргэ оҕолорун хайдах дьарыктыырга, көрөргө-истэргэ, реабилитациялыыр маллары сөпкө туһаныыга сүбэлэри биэрэллэр.
Манна даҕатан эттэххэ, Өрөспүүбүлүкэтээҕи доруобуйаларыгар хааччахтаах оҕолору реабилитациялыыр кииҥҥэ социальнай харысхал квотатынан биир киириигэ 202 оҕо 202 төрөппүтүн кытта кэлэн, реабилитация бараллар. Сылга 16 киирии баар, ол эбэтэр 3232 төрөппүт уонна 3232 оҕо хабыллар (ол иһигэр төрүөхтэриттэн 3 саастарыгар диэри оҕолорго Эрдэлээн көмө салаата), ОМС салаатынан 500 оҕо көрдөрүнэр.
-
0
-
0
-
0
-
0
-
0
-
0
