Икки тэпилииссэ сэргэстэһэ турарыттан биирдэригэр киирбитим, сарсыардаттан үлэ-хамнас ырааппыт. Этэргэ диэри, арассаада арааһа манна баар: оҕурсу, помидор, кабачок, биэрэс, хаппыыста, тыква, дьэдьэн, баклажан уо.д.а. Тэпилииссэҕэ уопсайа 2 тыһыынча арассаада үүнэр эбит. Бары үлэҕэ устудьуоннар улахан күүс-көмө буолаллар, кинилэр манна сылдьан элбэҕи билэллэр. Кыһыны быһа үөрэппиттэрин харахтарынан көрөн, илиилэринэн бигээн, сири-буору хаһан үүнээйини үүннэрэргэ, бүөбэйдииргэ холонон көрөллөр.
Мантан Дьокуускай, Покровскай куораттартан, улахан бөһүөлэктэртэн тэрилтэлэр анаан-минээн кэлэн ландшафтнай дизайнҥа сибэкки ылаллар. Аны туран, АСАТУ үлэһиттэрэ үүнээйилэрин аадырыска диэри илдьэн уонна өссө олордон биэриэхтэрин эмиэ сөп. Атыы бэс ыйын бүтүүтүгэр диэри ыытыллар. Ыһыах иннинэ ыһыы үлэтэ бүтэрин курдук бу күннэри баттаһа тиэтэйиҥ, бэйэ, иҥэмтиэлээх аһынан аһааҥ, кылгас сайыҥҥа тиэргэҥҥитин киэргэтиҥ, хараххытын үөрдүҥ!
Татьяна Владимирова.
-
0
-
0
-
0
-
0
-
0
-
0
