Быйылгы ааһан эрэр сылбыт Улуу Кыайыыга анаммыта. Ол чэрчитинэн оонньооботох оҕо саастаах ол кэм оҕолоругар анаммыт “Детство опаленное войной” диэн улахан кинигэ таҕыста, ол кинигэҕэ киирбит дьоннору чиэстээһин долгутуулаах түгэнэ буолла. Бу кинигэҕэ Сунтаартан 2 киһи – Николай Егоров уонна Зоя Прокопьева киирбиттэр. Чиэстээһиҥҥэ Николай кэргэнэ Евдокия Егорова кытынна, урутаан эттэххэ биэчэр бүтэһигэр бэйэтин талба талааныттан көрдөрөн дьону сэргэхситтэ.
Улуустартан кыттыбыт инбэлииттэр түмсүүлэриттэн Екатерина Иванова салайааччылаах Маар Күөл, Арина Павлова салайааччылаах Устье түмсүүлэрэ бэлиэтэнэн сертификатынан, сыаналаах бэлэхтэринэн бэлиэтэннилэр. Уонна бу кэпсии олорооччу өрөспүүбүлүкэ үрдүнэн “Сыл журналиһа” буолар үрдүк ааты сүгэммин өрөгөйүм үрдээтэ. Үлэбэр олус наадалаах планшет бэлэх тутан , чиэстэнэн үөрүүм муҥура суох.
Маннык тэрээһиҥҥэ аан бастаан сылдьар киһиэхэ барыта сонун. Хас кэлбит киһи бырааһынньыктыы симэммит саалаҕа киирэн иһэн олоххо – дьаһахха олус наадалаах ботуччу бэлэх тутар эбит. Сырдыкка, сылааска, баай – талым астаах остуол тула олорон эҕэрдэ эриэккэһин истэҕин, араас наҕараада үрдэ суох, бастыҥ ырыаһыттар мааны көстүүлэрин, кэрэ чуор куоластарын истэн манньыйаҕын, ким хайдах сатыырынан үҥкүүлээн өрө тэбии. Дьэ, ылбаҕай ырыаһыттар, имигэс үҥкүүһүттэр манна баалларыттан сөхтүм, үөрдүм, дьон олоххо тардыһыыта кынаттаата.
Быйыл Сунтаарбар эмиэ араас тэрээһиннэр буолбуттарын барытын истэ – билэ олоробун. Ол курдук “Икки сулус” талаан күрэҕэ, балыыһаҕа аһаҕас аан күннэрэ, парикмахерскайга чэпчэтиилээх өҥөлөр, библиотекаҕа госуслуганан туттарга үөрэтии, “Байҕал” бассейҥа сылдьыы, “Ийэм, аҕам , мин” дьиэ кэргэнинэн күрэх, адаптивнай спорт көрүҥнэртигэр араас күрэхтэр, оҕолорго сэрии тематыгар өй оонньуута, араас маастар кылаастар бу декада устата тиһигин быспакка бардылар, улахан сэргэхсийиини таһаардылар. Өссө декаданы сабыы үөрүүлээх, долгутуулаах түгэнэ күүтэр. Доруобуйатынан хааччахтаах киһи кини иннигэр турар мэһэйдэри туораан араас тэрээһиннэргэ кыттара, дьон – норуот иннигэр тахсара, айанныыра туспа уустуктардаах, ону доруобай киһи өйдөөбөт, салайааччылар эккитинэн – хааҥҥытынан билбэтэххит иһин өйгүтүнэн өйдөөн суолунан хааччыйаргыт буоллар. Быйыл суолларыгар харгыстары көрсөннөр улуус тыаларын кыттыылара быстар мөлтөх. Оннооҕор бу өрөспүүбүлүкэ үрдүнэн чиэстэнэр дьоннор бэйэлэрин үптэринэн кэлэллэр – бараллар, маны баҕас учуоттуургут наада.
Бу маннык үксүн дьиэҕэ хаайтарар дьон олохторугар чэбдик тыалы киллэрэр, олоххо тардыһыыларын күүһүрдэр дьоммут кимнээҕий? Салайааччыбыт судаарыстыбаннай сулууспа бэтэрээнэ, көмүскэллээх буолуу үлэтин туйгуна Наталья Максимова, кини көмөлөһөөччүлэрэ, быһаччы үлэни тэрийээччилэрэ, Светлана Гаврильева, Нина Краскова, Илларион Михайлов уонна киминэн да, тугунан да солбуллубат Афанасий Жараев.
Бары салайааччыларбар, биир түмсүүлээхтэрбэр чэгиэн туругу, чөл өйү – санааны, кэрэҕэ –үтүөҕэ дьулуһууну, олоххо , үрдүккэ тардыһыыны баҕарабын!
Зинаида Федотова - Дьол Кыыма
-
3
-
0
-
0
-
0
-
0
-
0
