Ленин уулусса бүтүүтэ аныгы бырайыагынан тутуллубут бары өттүнэн тупсаҕай баанньык дьахталларга уонна эр дьоннорго аналлаах отделениеларыгар киэҥ-куоҥ суунар, душтанар, паарданар, остуолларга олорон сынньанар, дуоһуйа кэпсэтэр, хатанар таҥас кабинкалардаах хостордоох. Сотору кэминэн кэҥэс хостоох кафе үлэлиэ.
Баанньыгы сөбүлэччилэри липа мастан оҥоһуллубут паарданар сир, паарга туттарга табыгастаах таастардаах, сииги оҥорон таһаарар парогенератордаах, күүстээх, сымнаҕас паар, тутааҕын баттаатаххына 30 сөкүүндэ үлэлиир«өйдөөх» душтар, паар кэннэ үөһэттэн тымныы уунан биирдэ саба куттар «биэдэрэ» кэтэһэллэр. Баанньыкка тупсаҕай туалеттар үлэлииллэр.
Баанньык сэрэдэ, чэппиэр, бээтинсэ, субуота, өрөбүл күннэргэ үлэлиирэ былааннанар, өрөбүл күннэр бэнидиэнньиккэ, оптуорунньукка түбэһиэхтэрэ. Сэрэдэ, чэппиэр күннэригэр үлэлээбэт биэнсийэлээхтэргэ, доробуйаларынан хааччахтаах дьоҥҥо төлөбүрдэригэрчэпчэтии көрүллүө.
Бу күннэргэ баанньыкка сылдьыы сыаната быһаарыллыа, чуолкайданыа.
Ян Попов баһылыктаах Бүлүү куорат дьаһалтата урукку баанньык эргэрэн, дьон олоҕор кутталы үөскэтэр буолбутугар саҥа баанньыгы туттарарга сөптөөх быһаарыы ылбытын, туттарбытын элбэх дьон өйүүр. Саамай кэрэхсэбиллээҕин билиһиннэрдэххэ, саҥа баанньык сайын эмиэ үлэлиэҕэ.
Саҥа баанньык Бүлүү куорат, нэһилиэктэр, ыаллыы сытар улуустар олохтоохторо сөбүлээн сылдьар сирдэрэ буоларыгар саарбах суох. Чугаһынан улуустарга дьоҥҥо анаан тупсаҕай оҥоһуулаах баанньык суох диэтэхпитинэ сыыспаппыт буолуо.
Таас баанньыгы Бүлүү куоратыгар хастыы да мэндиэмэннээх элбэх таас олорор дьиэлэри туттарбыт Андрей Арбыкин ылсан оҥотторбутун, үлэлэтэрин бэлиэтиир тоҕоостоох.
Бүлүү куората тупсар, киэркэйэр, дьон олороругар тупсаҕай буолан иһэр!
Николай Куприянов, "Олох суола".
-
0
-
0
-
0
-
0
-
0
-
0
