Үөрүүлээх куонкурус арыллыытыгар бэтэринээрийэ хайысхатын сайдыытын, инники үлэ торумнарын кэпсээтилэр. Онтон кылгастык билиһиннэриэм. Сахабыт Сирин бэтэринээрийэтэ сайдарыгар анал Стратегия ылыллан турар. Докумуон сүрүн соруга -- тыа хаһаайыстыбатын сүөһүтүгэр уонна кыылга-сүөлгэ сыстыганнаах ыарыылар турбаттарын туһугар ыытыллар үлэ сүрүн сайдар хайысхаларын быһаарар уонна бэтэринээринэй сулууспаны аныгы, аан дойду таһымнаах ирдэбилгэ эппиэттиир таһымҥа таһаарар сыаллаах.
Тыа хаһаайыстыбатын уонна аска-үөлгэ бэлиитикэ миниистирин солбуйааччы Сахайаана Павлова кэпсээбитинэн, Стратегическай уурааҕынан 2030 сылга диэри тыа хаһаайыстыбатын сүрүн баалабай көрдөрүүлэрин 1,5 төгүл улаатыннарарга Ил Дархан сорудахтаан турар. Билигин, ыстатыыстыка дааннайдарынан, этинэн 27% , үүтүнэн - 50%, оҕуруот аһынан - 36%, хортуоппуйунан уонна сымыытынан - 60% бэйэбитин хааччынабыт. Бу сыл саҕаланыытыгар чииптэммит ынах-сүөһү ахсаана 144 тыһ., сылгы -- 170 тыһ., таба -- 150 тыһ тахсаҕа тэҥнэспит.
Кини иһитиннэрбитинэн, Сахабыт Сиригэр бэтэринээрдэри бэлэмнээһиҥҥэ быйыл үөрэх тэрилтэлэригэр 215 миэстэ көрүллүбүт. Быйылгыттан улуустарга үлэлии барар эдэр исписэлиистэргэ «Земскэй быраас» бырагыраама курдук 2 мөл. солкуобайдаах биир кэмнээх төлөбүр бэриллиэ. Оттон Аартыка улуустарыгар барааччыларга - 2,5 мөл. солкуобай. Маныаха быйыл 10 кубуота көрүллүбүт.
СӨ Бэтэринээр управлениетын салайааччыта Игнатий Колодезников маннык күрэх сылын ахсын ыытылларыгар баҕа санаатын иһитиннэрдэ.
Кини бэлиэтээбитинэн, Ил Дархан уонна бырабыыталыстыба өйөбүлүнэн, бэтэринээринэй сулууспа 2030 сылга диэри сайдыытын стратегиятыгар олоҕуран 20 хайысханан үлэ барар. Ол иһигэр бэтэринээринэй управлениелар баазалара саҥардыллар, тырааныспарынан хааччыйыы тупсубут. Ол курдук, 2023 сылтан саҕалаан көмө суһаллык оҥоһулларын туһугар 30 массыына, хаар үрдүнэн айанныыр тырааныспар, мотуордаах оҥочолор, дезинфекциялыыр тэриллэр, көһө сылдьар лабораториялар ылыллыбыттар. Өрөспүүбүлүкэбит үрдүнэн 35 лаборатория ас-үөл куттала суох буолуутун хааччыйаллар, - диэн кэпсээтэ.
-
0
-
0
-
0
-
0
-
0
-
0
