Мэҥэ Хаҥалас Лоомтукатыттан кыттааччы, “Бэтэринээринэй сулууспа туйгуна”, түөрт кыыс амарах ийэтэ Екатерина Николаевна Алексеева идэтигэр бэриниилээхтик үлэлээбитэ номнуо 25-с сыла:
-- Төҥүлүтээҕи училищены бүтэриэхпиттэн харыс да сир хамсаабакка Лоомтукаҕа бэтэринээр биэлсэринэн үлэлиибин. Учаастакпытыгар уопсайа үс үлэһиппит. Биэс улахан тыа хаһаайыстыбатыгар турар ынахтары, сылгылары көрөбүт-истэбит. Билиҥҥи туругунан 470 хороҕор муостаах, 350 сыспай сиэллээх баар. Саас буолан төрөөһүн саҕаланна, этэҥҥэ баран эрэр.
Электроннай чииби, бииркэни кэтэрдэн, сүөһүгэ уонна кыылга-сүөлгэ маркировка оҥоробут. Бу дойдубут бэрэсидьиэнэ Владимир Путин тыа хаһаайыстыбатын сүөһүтүн барытын маркировкалыыр туһунан ыйааҕар олоҕуран ыытыллар үлэ. Хас биирдии маркировка тус (идентификациялыыр) нүөмэрдээх, ол кыылы-сүөлү учуоттуур судаарыстыбаннай систиэмэҕэ киирэр. Онно бу сүөһү ханнык быһыыны ылбыта, сааһа, боруодата, хаһаайына кимэ барыта ыйыллар. Инньэ гынан, чиип көмөтүнэн сүөһү барыта кэлим хонтуруолга ылыллар итиэннэ көмүскэллээх буолар, ол эбэтэр сүттэҕинэ биитэр ким эмит уордаҕына, тута булуллар. Көнньүнэн өлбүт сүөһү бэйдиэ быраҕылыннаҕына, хаһаайынын эмиэ ол нүөмэринэн булуллар.
Оттон тыҥаан турар кыһалҕалары таарыйдахха, кэлиҥҥи кэмҥэ өрөспүүбүлүкэҕэ адьырҕа кыыллар элбээннэр, бөрө-эһэ сылгыга, ынахха-сүөһүгэ кутталы үөскэтэр. Биһиги учаастакпытыгар бу эмиэ баар көстүү. Бөһүөлэкпит таһынан эһэ баар диэн бэлитииллэр. Ыраах сытар сылгы иитэр учаастакка хоромньуну таһаарар.
-
0
-
0
-
0
-
0
-
0
-
0
