Быйылгы дьыктааҥҥа барыта билиилэрин 23 киһи холонно, ол иһигэр, биир дойдулаахтарбыт, анал байыаннай дьайыы кыттыылаахтара Игорь Егоров, Сергей Степанов кэлбиттэр. Саамай эдэр кыттааччынан И.Г.Тимофеев аатынан лиссиэй 9-с “а” кылааһын үөрэнээччитэ Арсен Иванов, саамай аҕа саастаах кыттааччынан педагогическай үлэ бэтэрээнэ Валентина Аманатова буоллулар.
Дьыктаан суруйа кэлбит дьону “Биир ньыгыл Арассыыйа” баартыйа Мэҥэ Хаҥаластааҕы салаатын эппиэттээх сэкирэтээрэ Айталина Сыроватская эҕэрдэлээтэ. Кини: “Быйыл ахсыс төгүлүн ыытыллар дьыктаан “Биир ньыгыл Арассыыйа” баартыйа “Устуоруйа өйдөбүнньүгэ” федеральнай бырайыагын чэрчитинэн ыытыллар. 2019 с. Саха сиригэр 700-чэкэ киһи кыттыбыт буоллаҕына, быйыл 1030 былаһаакканан 35000 киһи кыттаары сылдьар. Сыл аайы кыттааччы ахсаана эбиллэн иһэр. Дьыктаан сыала-соруга – дойдубут норуоттарын сомоҕолооһун, ыччаты дойдуга тапталга иитии уонна Аҕа дойду Улуу сэриитин устуоруйатыгар бэйэ билиитин тургутуу буолар. Ким билиилээх, кыайыылаах буолан, Улуу Кыайыы бараатыгар кыттаргытыгар баҕарабын”, – диэтэ.
Сүрүннүүр бибилэтиэкэр Ирина Молокотина ааспыт сылга Доннааҕы Ростов куоракка байыаннай госпиталга тохсунньу ый устата уйулҕаһыт быһыытынан үлэлии сылдьыбыт сырыытыттан кылгастык сырдатта.
“Кыайыы дьыктаанын” суруйуу быраабылатын кылаабынай бибилэтиэкэр Наталья Басова сиһилии билиһиннэрдэ.
Аҕа дойду көмүскэлигэр фашизмы утары суостаах сэриигэ норуот хорсун быһыытын туһунан 25 ыйытыктаах, ол иһиттэн 15 тест, 10 кылгас хоруйу эрэйэр ыйытыктардаах дьыктааны 45 мүнүүтэ устата толордубут. Түмүккэ кыттыылаахтарга Туоһу суруктары туттардылар.
Бу аахсыйаҕа улууспут үрдүнэн уон алта былаһаакканан 180 киһи кыттыыны ылбытын бэлиэтиибит.
1941 – 1945 сс. Аҕа дойду Улуу сэриитигэр аҕа көлүөнэ бойобуой сырыыларын билэргэ, дойдуну таптыырга, бэриниилээх буоларга, дойду устуоруйатын үөрэтэргэ туһуланар тэрээһин үүнэр көлүөнэ ыччаты иитэр суолтата үрдүк.
Сонун төрдө уонна хаарытска: "Эркээйи", Марелла Баишева.
-
0
-
0
-
0
-
0
-
0
-
0
