Сахабыт Сиригэр бу күнү сылын аайы үҥкүү ансаамбыллара, кулууптар уонна оскуолалар араас кэнсиэрдэринэн, күрэхтэринэн киэҥник бэлиэтииллэр. Өрөспүүбүлүкэбит үрдүнэн тыһыынчанан үҥкүү ансаамбыллара олохтоохтору, кэрэни таптааччылары, биир идэлээхтэри түмэ тардар.
Биир оннук ансаамбылынан Ф.И. Авдеева аатынан Оҕо айымньытын дыбарыаһын иһинэн 2019 сыллаахха тэриллибит “Хотугу сулусчааннар” (“Северные звездочки”) инклюзивнай ансаамбыл буолар. Салайааччыта, СӨ култууратын үтүөлээх үлэһитэ, СӨ үөрэҕириитин туйгуна, “СӨ уус уран айымньытын сайдыытыгар киллэрбит кылаатын иһин” бэлиэ хаһаайына Надежда Андреевна Попова буолар.
Сатабыллаах салайааччы оҕолорго үҥкүү хамсаныыларын эрэ билиини буолбакка, көрөөччү кутун тугунан тутары билэр маастарыстыбаны тиэрдэр. Толору үҥкүү тэтимин туппут, баһылаабыт үҥкүүһүт бу сатабылын үүнэр кэнчээригэ тиэрдэрэ, үөрэтэрэ хайҕаллаах, төрөппүттэртэн махталлаах.
Ансаамбылга үс бөлөҕүнэн (кырачааннар, ортолор уонна улахаттар) 65 оҕо дьарыктанар. Манна кохлеарнай аппарааттаах оҕолору сэргэ, атын да көрдөрүүлэринэн доруобуйалырыгар хааччахтаах оҕолор үҥкүүлүүллэр, кинилэргэ кэрэ эйгэтигэр суол арыллар, дьонтон куттаммат, сыаннаттан толлубат буоларга дьарык үөскүүр, социализация уонна реабилитация ааһалларыгар көмө буолар.
Оҕолор элбэх норуоттар икки ардыларынааҕы, бүтүн Арассыыйатааҕы, өрөспүүбүлүкэтээҕи бэстибээллэр, куонкурустар, көрүүлэр кыайыылаахтара, гран-при хаһаайыттара. Холобурдаан эттэххэ, былырыын норуоттар икки ардыларынааҕы “Кыһыл көмүс болуоссат” бэстибээлгэ гран-при хаһаайыттарын үрдүк аатын сүкпүттэрэ.
“Северные звездочки” иитиллэччилэригэр үҥкүү күнүнэн итии-истиҥ эҕэрдэ, сырдыкка, үтүөҕэ- кэрэҕэ уһуйар Надежда Андреевнаҕа барҕа махтал, Саха Сирин өссө да элбэхтик ааттата тураргытыгар баҕарабыт.
-
2
-
0
-
0
-
0
-
0
-
0
