Общество

Дьаарбаҥкаҕа хас биирдии төрөппүт оҕотугар сөптөөх кээмэйдээх таҥаһы, атах таҥаһын, канцелярскай маллары, үрүсээктэри булар кыахтаах. Куорат олохтоохторо уонна киин куорат ыалдьыттара биир сиргэ дьиэ кэргэн ханнык баҕарар бүддьүөтүгэр эппиэттиир наадалаах табаардары барытын атыылаһыахтарын сөп эбит диэн көрдүм.  Кэлиҥҥи кэмҥэ оскуола үөрэнээччи таҥаһыгар-сабыгар туруорар ирдэбилин толоруу уустук соҕус буолла. Төрөппүттэр оскуола, гимназия эбэтэр лицей анал бэлиэтин, успуорт саалатыгар кэтиллэр үрүҥ уллуҥнаах кроссовкалары уонна оскуолаҕа аналлаах чопчу өҥнөөх уонна дьүһүннээх форманы атыылаһыахтаахтар.

«Оскуола дьаарбаҥкатыгар» бөдөҥ маҕаһыыннартан "Азбука", "Акварель", "Канцпроф" курдуктар улахан балааккаларга эгэлгэ аахсыйаларын тэрийбиттэр. Холобур, үрүсээк атыыластаххына, канцелярскай маллары бэлэхтииллэр эбит. Эбэтэр, 1998 солк. элбэх суумаҕа атыыластаххына, сыаналаах бэлэх сүүйүөххүн сөп.

«Оскуола дьаарбаҥкатын» сыаналара куорат орто сыаналарыгар эппиэттиир. Ол курдук, үрүсээктэри 850 солк. саҕалаан, маҥнайгы кылаас үөрэнэ киирбиттэргэ аналлаах суумкалары  2000 солк атыылаһыахха сөп. Сыаната оҥорон таһаарааччытыттан, тигиллибит матырыйаалыттан тутулуктаах. Ол курдук, сорох үрүксээктэр 5000 солк. үрдүккэ тураллар.

Уолга аналлаах көстүүмү 2500 солкуобайга, оттон итиччэ суумаҕа кыыс оҕоҕо ырбаахылаах уонна дьууппалаах кэмпилиэги ылыахха сөп. Түүппүлэлэр дьаарбаҥкаҕа 1000 солк. саҕаланан атыыланаллар.  Саамай чэпчэки тэтэрээт сыаната 10 солк, өҥнөөх тастаахтар 30 солк. үрдүктэр, сыаната лиистэрин ахсааныттан тутулуктаах. Уруучука, ортотунан, 20 солк. саҕаланар.

Атыыга Арассыыйаҕа оҥоһуллубут элбэх табаар, ону тэҥэ интэриэһинэй мал-сал баар. Холобур, трансформер сарапааннары олус сэҥээрдим. Үрдүн уһуллахха, бэртээхэй дьууппаҕа кубулуйар. Оннук курдук моһуоннаах кыыс оҕоҕо ырбаахылар эмиэ элбэхтэр.

Атыылааччылары кытары кэпсэттэххэ, таҥастар үксүн Кытайга, Киргизияҕа, Турцияҕа, Арассыыйаҕа тигиллибиттэр.  “Билигин оҕолор талымас буоланнар, хаачыстыбатынан уонна муодунайын талаллар. Ону таһынан, табыгастаах буолуохтаах. Сэбиэскэй оскуола фартуктара уонна былааччыйалара кытары бааллар. Кыргыттарга быйыл бүрүүкэни ордук ылалларын бэлиэтиибит. Ханнык баҕарар халлааҥҥа сылаас буоларын иһин дииллэр”, -- диэн кэпсээтилэр.

Дьаарбаҥкаҕа этэллэринэн, атыылаһааччылар атырдьах ыйын 15 күнүн кэнниттэн  элбиэхтэрэ.

Галина МАТВЕЕВА бэлэмнээтэ.  

Ааптар хаартыскаҕа түһэриилэрэ.