Мунньахха халаан содулун туоратыы уонна кэлэр оттук сезонугар хомунаалынай инфраструктураны бэлэмнээһин тэрээһиннэрин дьүүллэстилэр. Мунньахха норуот дьокутаата Сергей Сивцев уонна Эҥэ нэһилиэгин баһылыга Руслан Семенов кытыннылар, диэн норуот дьокутаата МАХ ханаалыгар иһитиннэрдэ.
Үөһээ Дьааҥыга, Боронукка, Томторго, Сайдыыга уонна Суордаахха уу таһыма түһэн истэҕин аайы, халаан содулун ордук толору сыаналыыр кыах үөскүүр. Сүүһүнэн тиэргэн, уонунан олорор дьиэ, оскуолалар, оҕо уһуйааннара уонна успуорт тэрилтэлэрэ ууга былдьаммыттар. Билигин саахалы чөлүгэр түһэрэр үлэ-хамнас күүскэ бара турар, ууну оботторуу уонна дьиэ конструкцияларын куурдуу ыытыллар.
Эмсэҕэлээбит дьоҥҥо былаас уорганнара, өрөспүүбүлүкэ ис сүрэҕиттэн кыһаллар олохтоохторо, тэрилтэлэр кэлэктииптэрэ уонна «СӨ ОДьКХ» ГУП үлэһиттэрэ сүҥкэн өйөбүлү оҥороллор. Баатаҕай бөһүөлэгэр Дьокуускайтан 5,2 туонна гуманитарнай таһаҕас: ас-үөл, бастакы наадалаах эмп-томп уонна тутуу матырыйаала — номнуо тиэрдиллибит. Ону таһынан волонтердар пууннарыгар өссө 5,5 туонна гуманитарнай көмө хараллан сытар.
«Бүгүн эмсэҕэлээбит нэһилиэнньэлээх пууннарга хочуолунайдары үлэлэтии боппуруоһа быһаарылла турар. Итиини эрдэ биэрии олорор дьиэлэри уонна социальнай эбийиэктэри куурдар үлэни түргэтэтиэҕэ. Улуус дьаһалтатын уонна анал сулууспалары тымныылар түһүөхтэригэр диэри дьоҥҥэ-сэргэҕэ табыгастаах усулуобуйаны тэрийиигэ салгыы үлэлиибит», — диэн Виталий Чикачев иһитиннэрдэ.
Сонун төрдө уонна хаартыска: Ил Түмэн пресс-сулууспата.
-
0
-
0
-
0
-
0
-
0
-
0
