Дэлэгээссийэ от ыйын 28 күнүгэр «Өлүөхүмэ кыладабыайа» ХЭТ-кэ, «Поиск» кэпэрэтиипкэ уонна сортобуой учаастакка, В.Г. Пермин бааһынай хаһаайыстыбатыгар сылдьан, уу ылан ааспыт бааһыналарын, ходуһаларын көрдө.
От ыйын 29 күнүгэр улуус дьаһалтатыгар нэһилиэктэр баһылыктара, хаһаайыстыбалар салайааччылара кыттыылаах сүбэ мунньах ыытылынна. Тыа хаһаайыстыбатын управлениетын начаалынньыга Афанасий Антонов иһитиннэрбитинэн, улууска 11 тыһыынча гектар ходуһа сирэ туһанылларыттан 7 956 гектаарын уу ылбыт. Сүөһү аһылыга ыһыллыбыт 339 гектаар бааһыната ууга былдьаммыт, ол иһигэр 246 гектара «Өлүөхүмэ кыладабыайын» бааһыната, итинтэн 72 гектаар ыһыы өрүһүлтэтэ суох буолбут. Кыллаах нэһилиэгэр 93 гектаар, ол иһигэр 65 гектаар биир сыллаах от, атын түөрт нэһилиэккэ 82 гектаар хортуоппуй былдьаммыт.
Тыа хаһаайыстыбатын табаарын оҥорооччуларга уматыкка лимит от ыйыгар – 20 туонна, атырдьах ыйыгар 13 туонна дизельнэй уматык, 25 туонна бензин тыырыллыбыт. Ол эрээри, бу наадыйыыны хааччыйбат, аҥардас «Өлүөхүмэ кыладабыайыгар» 14,5 туонна уматык ирдэнэр.
Сахаяна Афанасьевна Бырабыыталыстыба уматык боппуруоһун быһаарыыга үлэлэһэ сылдьарын эттэ. Төһө да ыарахаттар баалларын үрдүнэн, кыстыыр оту хааччынар, сүөһү-сылгы ахсаанын аҕыйаппат соругу туруорда. Быйыл 63 тыһ туонна үүт соҕотуопкаланыахтааҕын, онуоха анаан субсидия көрүллүбүтүн туһунан эттэ.
Олохтоохтор ходуһа ууттан эмсэҕэлээһинин ороскуотун толуйууга, ыраах көһөн оттуур мобильнай биригээдэлэргэ туох көмө көрүллэрин туһунан ыйыттылар. Кэтэх ыаллар ыанар ынахтарыгар субсидия көрүллүүтүн сөргүтэргэ, халааннаабыт улуустар хаһаайыстыбаларыгар үүт харчытын урутатан ыытарга, «көҥүл хотууру» эрдэ биллэрэргэ, комбикуорумунан хааччыйыы боппуруоһун быһаарарга туруорустулар.
«Поиск» кэпэрэтиип салайааччыта Алексей Самсонов сүөһү аһылыгын саҥаттан ыһар буоллахха, күһүҥҥэ диэри син ситиэ этэ, онуоха сиэмэ уонна уматык быһаарылла охсуон наада диэтэ. Кэпэрэтиип ыскылаатыгар ааспыт кыстыктан ордубут 300 туонна бурдук баарын, ону таһынан быйыл бурдук 350 гектарга ыһыллыбытын, онон комбикуорум баар буолуон сөбүн эттэ.
Бу туһунан «Өлүөхүмэ» хаһыат суруналыыһа Дарья Тимофеева суруйбутун Тыа хаһаайысытыбатын уонна ас-үөл бэлиитикэтин министиэристибэтин саайта таһаарда.
Хаартыска: Валерий Малышев.
-
1
-
0
-
0
-
0
-
0
-
0
