Министиэристибэҕэ бэлиэтээбиттэринэн, сорох улуустарга от үлэтигэр ардах содулуттан үөскээбит халаан мэһэйдээбит. Халаантан 14 улуус уонна Дьокуускай куорат хаһаайыстыбалара эмсэҕэлээбиттэр.
«Өлүөнэ өрүс халааныттан эмсэҕэлээбит улуустарга көмөлөһөр сыалтан мобильнай биригээдэлэр тэрилиннилэр. Алта улууска 91 мобильнай биригээдэ үлэлиир, кинилэр 2 624 туонна оту бэлэмнээтилэр», — диэн министиэристибэҕэ эппиттэр.
Ордук уустук быһыы-майгы Аартыка улуустарыгар — Үөһээ Дьааҥыга, Абыйга, сорох өттүгэр Муомаҕа, Өймөкөөҥҥө, Орто Халымаҕа, Эбээн-Бытантайга үөскээбит. «Ону таһынан, ходуһалар Өлүөхүмэ улууһугар ууга былдьаннылар, — диэн тыа хаһаайыстыбатын министиэристибэтигэр чуолкайдаабыттар. — Өрөспүүбүлүкэ киин өттүгэр Хаҥалас, Уус Алдан улуустарын хаһаайыстыбалара уонна Дьокуускай арыы учаастактара эмсэҕэлээтилэр».
Саха Сирин баһылыга Айсен Николаев дьаһалынан оту соҕотуопкалааһыны тэрийэргэ, кытаанах аһылык саппааһын пуондатын хааччыйарга 37 мөлүйүөн солкуобайтан тахса үп көрүллүбүт. Эмсэҕэлээбит улуустарга сүөһү уонна сылгы ахсаанынан олоҕуран, өйөбүл кээмэйэ быһаарыллар.
«Сорох улуустарга былырыыҥҥы 8,4 тыһ. туонна кэриҥэ көһөрүллэр от саппааһа баар. Өрөспүүбүлүкэҕэ атырдьах ыйын 13 күнүнээҕи туругунан 192 531 гектар ходуһа охсулунна, 188 931 туонна от (былаантан 45%), 2 407 туонна силос, 522 туонна сенаж соҕотуопкаланна. Оту бэлэмниир хампаанньаҕа 22 546 киһилээх 8 тыһыынчаттан тахса звено кыттар. От үлэтигэр барыта 10 146 араас модификациялаах трактор тардылынна», — диэн өрөспүүбүлүкэ тыа хаһаайыстыбатын министиэристибэтигэр чуолкайдаабыттар.
Ону таһынан, 2026 сылга киин улуустарга агрономнар сыллааҕы тоҕоостоох сыллары кытта тэҥнээтэххэ, сэлиэһинэй уонна эбиэс үүнүүтүн кыаҕа 10-15% намтаабытын бэлиэтииллэр. Итини сэргэ, кураантан сылтаан Уус Алдан улууһугар уонна Дьокуускай эргин үүнээһин эмсэҕэлээбит.
Сонун төрдө: ТАСС
Хаартыска: эрэдээксийэ архыыбыттан.
-
1
-
0
-
0
-
0
-
0
-
0
