Халаан кэнниттэн хаһаайыстыбалар ханна сир тахсарынан оттооһуну тэрийбиттэрэ. Ол түмүгэр, Өлүөхүмэ улууһа 10 784 туоннаны оттоон, кыстыыр отун 81 %-ын булуммут, ону таһынан 1 685 туонна сиилэһи, 386 туонна сенаһы бэлэмнээбит. Орто Халыма улууһа 4 128 туоннаны чөкөтөн, былааннаах отун 95 %-ын хааччыммыт.
Ходуһатын улахан өттүн ууга былдьаппыт Дьааҥы улууһа 4 261 туоннаны чөкөтөн, кыстыыр отун 48,6 %-ын булуммут. Улуус саамай бөдөҥ хаһаайыстыбата «Полюс холода» кэпэрэтиип иһинэн үлэлиир «Алгыс» кэпэрэтиип «Күүлэй» уонна субуотунньук тэрийэн, кыбыытыгар 80 туонна оту киллэриммит.
– Дуогабардаспыт биригээдэлэрбит отторун эптэххэ, суол аһыллыар диэри сиирбит баар буолуо этэ, онтон кыһын сииргэ анаан 190 туоннаны атыылаһар туһунан киин улуустары кытары бэйэбит даҕаны ханаалбытынан уонна тыа хаһаайыстыбатын улуустааҕы управлениетын нөҥүө даҕаны кэпсэтиһэ сылдьабыт, – диэн этэр кэпэрэтиип салайааччыта Екатерина Портнягина.
Ил Дархан сорудаҕынан, саппаас от пуондатын тэрийэргэ анаан 37 мөлүйүөн солкуобай харчы эбии көрүллүбүтэ. Халаантан эмсэҕэлээбит улуустары хааччыйарга анаан 27 940 туоннаны бэлэмниир соругу туруорунан, 14 улууска 126 мобильнай биригээдэ тэриллэн оттуу сылдьар. Холобур, Прокопий Белолюбскай иһитиннэрбитинэн, Уус Алдан улууһун мобильнай биригээдэлэрэ 1000 туоннаны бэлэмнииргэ соруктаналлар.
Күн бүгүҥҥү туругунан, мобильнай биригээдэлэр барыта холбоон, 19 317 туонна оту кэбиспиттэр.
Хаартыска: Эрэдээксийэ пуондата.
-
0
-
0
-
0
-
0
-
0
-
0
