Бу уонна да атын ыйытыктары СӨ ИДьМ иһинэн Гражданскай сэбиэт лииньийэтинэн уопсастыбаннай мониторинг чэрчитинэн СӨ ИДьМ ГИБДД ЦАФАП салайааччыта Шамиль Доминовы кытта дьүүллэстибит диэн норуот дьокутаата Иван Луцкан МАКС ханаалыгар суруйда.
Суоппардарга туһалаах чахчылар:
- Саха Сиригэр баар бары камералар испииһэктэрин манна киирэн көрүҥ: https://госавтоинспекция.рф/r/14/milestones/?page=1
- Тулалыыр шоссеҕа (Окружное шоссе) турар камералар бары түргэни эрэ буолбакка, куттала суох буолуу курун баанарга уонна төлөпүөнү туттарга эмиэ бэрэбиэркэлиир кыахтаахтар.
- Дьокуускай куорат быһа охсуһууларыгар (перекресток) саҥа, быдан өйдөөх уонна сайдыылаах комплекстары туруордулар.
- Сайыҥҥы кэмҥэ сууккаҕа 8000-ҕа тиийэ ыстараап түһэриллиэн сөп, кыһын ахсаана аҕыйах.
Суоппарга туһалаах сүбэлэр:
- Светофорга күөх уот умайан турдаҕына, тохтобул лииньийэтин (стоп-линия) аастыгыт, ол эрээри кыайан эргийбэтигит (миэхэ суол биэрбэтилэр) — хамсаамаҥ, төттөрү барымаҥ! Оччоҕуна ыстараап кэлбэт.
- Бары видеолары уонна хаартыскалары хас да үлэһит көрөр. Буруйу оҥоруу чахчыта баарын итэҕэйдэхтэринэ эрэ ыстараап суруллар. Холобур, камера илиигэ маллаах киһини түһэрбит, ону төлөпүөн диэн быһаарбыт. Онуоха үлэһит чугаһатан көрбүтэ — уу бытыылката эбит. Ыстараап суруллубат.
- Улахан уйуктаах массыыналарга (большегруз) билигин оҥоһуу өй (искусственнай интеллект) систиэмэтэ үлэлиир. Кинилэр нүөмэрдэрин кистээтэхтэринэ, систиэмэ айаннаабыт суолларыгар турбут атын камералар хаартыскаларын барыларын тэҥнээн көрөр. Массыынаны ураты бэлиэлэринэн (эбэтэр атын сиргэ көстөр нүөмэринэн) булан ыстараап туруорар. Онон, суолу ыарахан уйуктаах массыынанан алдьатар дьон толкуйданыахтарын наада.
- Ыстараап сыыһа түстэ дии саныыр буоллаххытына, 10 күн иһигэр онлайн эбэтэр ханнык баҕарар эрэгийиэҥҥэ ГИБДД салаатыгар утарар кыахтааххыт. Сибээһэ суох сылдьыбыт буоллаххытына, кэлэн баран утарар болдьоххутун (срок) чөлүгэр түһэриэххитин сөп.
- Массыына атыыласпыт, ол эрээри учуокка туруорбатах дьон сэрэниҥ. Урукку хаһаайыттар массыынаны учуоттан бэйэлэрэ усталлар, оччоҕо нүөмэрдэр тута көрдөөһүн систиэмэтигэр (розыск) киирэллэр. ГИБДД үлэһиттэрэ тохтоттохторуна, кыһалҕа үөскүөн сөп. Онон сокуону тутуһан, барытын кэмигэр оҥорор ордук.
Бэйэҕитин, чугас дьоҥҥутун харыстааҥ уонна суол быраабылаларын кэһимэҥ.
Сонун төрдө уонна хаартыска: Доктор Луцкан МАКС ханаала
-
0
-
0
-
0
-
0
-
0
-
0
