Сийиэс дэлэгээттэрэ кэлиҥҥи үс сылга ыытыллыбыт үлэ түмүгүн таһаарыахтара, салалта саҥа уорганын талыахтара, устаабы бигэргэтиэхтэрэ уонна 2025 сылга диэри сайдыы стратегиятын ылыныахтара.
Бэрэсидьиэн Владимир Путин эдэр дэлэгээттэргэ бэйэтин эҕэрдэтин ыытта.
"Үүнэр сүһүөх ыччаты патриотизм сыаннастарыгар, Аҕа дойду историятын уонна култууратын ытыктааһыҥҥа олоҕуран иитии боппуруостара судаарыстыба чорботор, ураты суолталаах соруктарыттан биир боччумнаахтара буолар. Арассыыйа үөрэнээччилэрин хамсааһына ааспыт сылларга бэйэтин тэрийэр, айар-тутар потенциалын бөҕөргөппүтүн, дойду бары эрэгийиэннэриттэн биир санаалаахтарын -- үөрэнээччилэри, педагогтары, төрөппүттэри -- түмэн, кэккэтин хаҥаппытын астына бэлиэтиибин" диэн этиллэр судаарыстыба баһылыгын туһаайыытыгар.
Үөрэх миниистирэ Сергей Кравцов:
--"Арассыыйа Федерациятыгар гражданнары патриотическай иитии" федеральнай бырагыраама, «Үөрэхтээһин» национальный бырайыак «Социальнай актыыбынас» хос бырайыагын чэрчилэринэн РДШ үлэтин ситимнээхтик өйөөһүн, Арассыыйатааҕы оҕо киинин көхтөөх үлэтин түмүгэр, 2021 сылга, бу иннинээҕи 2020 сылы кытары тэҥнээтэххэ, икки төгүл элбэх оҕону бэйэтин тула түмтэ, -- диэтэ.
Күн бүгүн Арассыыйа үөрэнээччилэрин хамсааһына бүтүн Арассыыйа үрдүнэн 2 мөлүйүөн актыбыыһы түмэр, саамай маассабай оҕо тэрилтэтэ буола үүммүтүн бэлиэтээтэ.
Сийиэс үлэтин бастакы пуунунан ааспыт үс сыл устатыгар ыытыллыбыт үлэ түмүгүн ырытыы буолла. Отчуоту РДШ бэрэссэдээтэлэ, космонавт-лүөччүк, Арассыыйа Дьоруойа Сергей Рязанскай оҥордо.
2019 сыллаахха ыытыллыбыт IV сийиэс кэнниттэн Арассыыйа үөрэнээччилэрин хамсааһыныныгар киирбит үөрэх тэрилтэлэрин ахсаана элбээн, 26 000 (2019 с. – 7 669), РДШ маҥнайгы сүһүөх салаатын ахсаана 9 536 (2019 с. – 1485) буолбут.
-- Билиҥҥи үөрэнээччи болҕомтотун тардар судургута суох дьыала. Ол да буоллар, РДШ үлэтин ис хоһооно үгэс буолбут түөрт хайысха чэрчититтэн тахсан, билигин оҕолор личностарын, айар, интеллектуальнай кыахтарын арыйарга-сайыннарарга тирэх буолар 50-тан тахса араас дьаһал, бырайыак чэрчитинэн үлэлиир-хамсыыр. «Шеф в школе» диэн бырайыак кыттааччылар көҕүлээһиннэринэн, фантазияларынан оскуолатааҕы менюны атын хараҕынан көрөр кыаҕы үөскэттэ. Икки сезон устатыгар 17 тыһыынча кэриҥэ үөрэнээччи санаата хомуллан анаалыстанна. Биһиги оҕолорбут этиилэригэр тирэҕирэн, оскуола аһылыгар уларытыылары киллэрэргэ кэккэ этиилэр Роспотребнадзорга ыытылыннылар. «Оскуола муодатын министиэристибэтэ» куонкурус оскуолаҕа кэтиллэр форма дьиҥнээх каталогар кубулуйда. Оҕолор айан оҥорбут моделларынан кэллиэксийэлэри көрдөрүү ГУМ-ҥа тэриллиэҕэ. Ити курдук бырайыактар оҕо оскуолатааҕы олоҕу хайдах көрөрүн, үөрэнэр кылааһы таһынан туох баарын, ону үөрэнээччи төһө сөбүлүүрүн кэрэһилииллэр. Ити биһиэхэ оскуоланы тупсарар кыаҕы биэрэр, – диэтэ Сергей Рязанскай.
Дэлэгээттэр салгыы РДШ бэрэссэдээтэлин, хос бэрэссэдээтэлин, Сүрүннүүр сүбэтин таллылар, Устаап саҥа эрэдээксийэтин уонна 2025 сылга диэри сайдыы стратегиятын бигэргэттилэр.
Бүгүн – сийиэс иккис күнэ. РДШ былаһаакатыгар, «Улахан оскуолатааҕы пикниккэ», оҕолор оробуочай бөлөхтөрүн киэҥ ыҥырыылаах мунньахтара ыытыллыаҕа. Онно Стратегияны дьүүллэһиэхтэрэ, итиэннэ ону эрэгийиэннэргэ олоххо киллэриигэ суол каартатын оҥоруохтара, ураты чорботуллар быайыактар испииһэктэрин бигэргэтиэхтэрэ. Бу туһунан ФедералПресс иһитиннэрэр. Сийиэс матырыйаалларын маннык сыылканан билсиҥ: https://disk.yandex.ru/d/rombPDuEUbS5Yw
Ыспыраапка:
«Арассыыйа үөрэнээччилэрин хамсааһына» Бүтүн Арассыыйатааҕы уопсастыбаннай-судаарыстыбанай оҕо-юношескай тэрилтэтэ Бэрэсидьиэн Владимир Путин ыйааҕынан, үүнэр сүһүөх эдэр ыччаты иитиигэ судаарыстыба ыытар бэлиитикэтин тупсарар сыалтан, 2015 сыллаахха, алтынньы 29 күнүгэр тэриллибитэ. Экология, добровольчество, медиа, спорт, айар үлэ, дизайн уонна бэйэни салайыныы курдук хайысхаларынан федеральнай бырайыактарга үлэлэһэр.
-
0
-
0
-
0
-
0
-
0
-
0
