Ону сэргэ "Саха Өрөспүүбүлүкэтигэр остуол национальнай оонньууларын сайыннарар аныгы хайысхалар" диэн научнай-практическай кэмпириэнсийэ буолла.
Манна медицина наукаларын дуоктара Ариадна Донская хабылык уонна хаамыска доруобуйаҕа туһалааҕын туһунан научнай үлэ суруйа сылдьар. Кини бу оонньуулары популяризациялыырга сиһилии чинчийэн, туһатын дакаастыыр наадатын эттэ. Ол туһугар кини бырайыагынан граҥҥа кыттар былааннааҕын биллэрдэ. "Саха оонньууларыгар анаан Ийэ скверигэр остуоллары туруордулар. Бу төрүт оонньууларбытын киэҥник тарҕатарга, биллэрэргэ өссө биир көҕүлүүр күүс буолар", - диэн үөрүүтүн үллэһиннэ Ариадна Донская.
Дьахтар тэрилтэлэрин сойууһун бэрэссэдээтэлэ Анжелика Андреева остуол национальнай оонньуулара кэскиллээх хайысха буоларын ыйда. "Аан дойдуга буола турар сабыытыйаларынан ыччакка патриотическай иитии суолтата өссө үрдээтэ, онон бэйэбит төрүт оонньууларбыт онно тирэх буолуохтаахтар" - диэн эттэ Анжелика Егоровна.
Национальнай остуол оонньууларын тириэньэрэ Надежда Белолюбская хабылык, хаамыска кэлиҥҥи кэмҥэ Спорт министиэристибэтин өйөбүлүнэн сайдан ахан эрэрин, бу оонньууларга спорт көрүҥүн быһыытынан нуормалар олохтоммуттарын эттэ. Ол гынан баран, спорт маастарын аатын ылар кыах суох эбит. Онон бу көрүҥҥэ маастар аатын ылар кыаҕы биэрэллэригэр резолюцияҕа этии киллэрдэ.
Кэмпириэнсийэ резолюциятыгар этиилэр киирдилэр:
- Оскуолаларга оҕолор саха төрүт остуол оонньууларын оонньуулларыгар усулуобуйаны тэрийии;
- Өрөспүүбүлүкэ оскуолаларыгар эбии үөрэхтээһин быһыытынан саха төрүт оонньууларын киллэрии;
- Хабылык, хаамыска оонньуутун нуормалааһын: сааһынан араарыы уонна хабылык, хаамыска кээмэйин ыстандаардын оҥоруу;
- Хабылыкка, хаамыскаҕа спорт маастарын аатын ылар кыаҕы биэрии.
- 2
- 0
- 0
- 0
- 0
- 0