--Биһиги норуоппут икки хааччахтаах сыл кэннэ түмсэн, Үс Хатыҥҥа оҕотуттан кырдьаҕаһыгар тиийэ бары бэйэлэрин омуктарын таҥаһын таҥнан, сүрдээх кырасыабай көстүү ойууланан таҕыста. Манна кэлбит бары күбүрүнээтэрдэр, ЮНЕСКОҕа киирбит култуура нэһилиэстибэтин илдьэ сылдьар омуктар сөҕөн-махтайан бардылар. Ити сүрдээх элбэх үлэттэн тахсар.
Кэнгириэскэ ыҥырыллыбыт дэлэгээттэр, эһиги саха норуотун саамай чөмчөкөлөрө, эппиэтинэстээх дьоно буолаҕыт. Эһигини көрөрбүттэн үөрэбин. Холобура, Февронья Васильевна Шишигиналыын бииргэ үлэлэспиппит. Кини олоҥхону ылсыаҕыттан Александр Николаевич Жирковтуун наһаа элбэх үлэни оҥордулар. Сарсыардаттан киэһээҥҥэ диэри Февронья Васильевна, 5-тэн тахса сылы быһа отой сылайбакка, олоҥхоһуттарын истэр. Куруук этэбин: "Февронья, наһаа да тулуурдааххын" - диэн. Мин чааһы кыайбакка сөп буолабын. Куруук ыксыы сылдьар буоллаҕым дии. Онно барыахтаахпын, манна барыахтаахпын. Ол баран иһэн көрөбүн -- Февронья сүрдээх болҕомтолоохтук истэ олорор. Онтон төннөн иһэбин - Февронья эмиэ олорор. Күн тахсыытыттан киэһээҥҥэ диэри. Ол үлэтэ мээнэ хаалбатах. Баһылыкпыт Айсен Сергеевич Николаев бастыҥ олоҥхоһуттарга ый аайы 30-туу тыһыынча солкуобай истипиэндьийэ анаата. Ити эмиэ үлэттэн тахсар.
Дьүкээгирдэр бастакы букубаардара тахсар. Тылларын билэр уонча эрэ киһи хаалла. Ити эһиэхэ, саха норуотугар, кэлиэ суохтаах. Ол иһин эһиги бу мустан олороҕут.
Арассыыйа таһымыттан улахан бырагыраамалар ылылланнар, аҕыйах ахсааннаах норуоттар тылларын сөргүтүү саҕаланна. Сийиэстэри саҕалаатыбыт. Феодосия Васильевна Габышева көмөтүнэн ЮНЕСКОҕа көс оскуола киирдэ уонна аҕыйах ахсааннаах норуоттар сийиэстэрэ сыл аайы ыытыллар буолла. Ити көстүбэт гынан баран, сүрдээх сыралаах үлэ түмүгэ.
10 сыл турууласпыппытын кэннэ, Айсен Сергеевич суолтатын өйдөөн, Ырыа күнүн аныырга ыйаах таһаарда. Мантан ыла мелодистарбыт сахабыт ырыата сайдарыгар былааннаахтык үлэлиэхтэрэ, тылыгар болҕомто ууруохтара, оҕолорго бырагыраама оҥоруохтара. Ис хоһоонноох, иитэр суолталаах ырыалары айыахтара. Ырыа бары өттүнэн сайдарыгар олук уурулунна.
Онон, омук быһыытынан сайдыыбытыгар туһуламмыт үлэлэр бары сомоҕо күүспүтүнэн баран иһэллэр. Иннибитигэр үлэбит наһаа элбэх. Түмсүөҕүҥ, сомоҕолоһуоҕуҥ, тупса туруоҕуҥ!
-
0
-
0
-
0
-
0
-
0
-
0
