Быыстапкаҕа аныгы мультимедийнай технологиялары, арт-эбийиэктэри уонна кэрдиис кэм бэлиэлэрэ буолбут түмэл экспонаттарын көрүөххэ сөп. Манна дьиҥ уонна виртуальнай, ааспыт уонна инники, аныгы уонна үгэс буолбут ускуустуба көрүҥнэрэ холбоспуттар. Хас биирдии саалаҕа ити кэм быһыытыгар-майгытыгар киириэххит, устуоруйа хайдах уларыйбытын билиэххит.
1898 сыллаахха атырдьах ыйын 12 күнүгэр Дьокуускайдааҕы генерал күбүрүнээтэр Александр Дмитриевич Калинкин Саха уобалаһын күбүрүнээтэригэр Владимир Николаевич Скрыпицыҥҥа 1900 сыллаахха Парижка ыытыллар аан дойдутааҕы быыстапкаҕа Саха уобалаһа туох баар ураты экспонаттарын хомуйан ыыппыта. Бу уонна устуоруйа атын кэрэхсэбиллээх түбэлтэлэрин туһунан сахалыы да, нууччалыы да сиһилии кэпсиэхтэрэ. Туох, ханна, хайдах буолбутун ханнык тылынан истиэххин, билиэххин баҕараргын баттаан талыаххын эрэ наада.
Гражданскай сэрии кэминээҕи сүрүн утарсар өрүттэр – «кыһыллар» уонна «үрүҥнэр» сэриилэһэр таҥастарын кытта билсиэххэ сөп. Экспонаттар ортолоругар дэҥҥэ көстөр матасыыкыл коллекцията баар.
Сэбиэскэй былаас кэлбитин кэннэ Саха Сиригэр «Таҥараны билиммэт кимиилээх дьон түмсүүтэ» тэриллибитэ. Бу түмсүү итэҕэли уонна ойууннааһыны утары хайдах охсуспутун туһунан араас матырыйааллар бааллар.
Быыстапка Саха Сирин саҥа кэмин эмиэ хабар. Холобур, өрөспүүбүлүкэҕэ наука хайдах сайдан испитэ, сахалыы киинэ өрө тахсыбыта, бэл, Өлүөнэ өрүһү туоруур муоста макыата баар.
Ити курдук, Сахабыт Сирэ араас сылларга элбэҕи ааһан, бүгүҥҥэ диэри баай култууралаах, ураты устуоруйалаах тиийэн кэллэҕэ. Онон өрөспүүбүлүкэбит аптаныамыйата олохтоммута 100 сылыгар аналлаах быыстапкаҕа сылдьан, устуоруйабыт сонун өрүттэрин, интэриэһинэй чахчыларын билсиҥ, сэргээҥ, кэрэхсээҥ.
- 0
- 0
- 0
- 0
- 0
- 0