Ил Түмэн бэрэссэдээтэлин бастакы солбуйааччы Александр Жирков стадиону чөлүгэр түһэрэ сылдьар үлэһиттэр, волонтёрдар санааларын көтөхтө:
-Оонньуулар былаан быһыытынан тиһигин быспакка бара туруохтара. Баннердар хайдыбыттара улахан сүтүк буолбатах, онто да суох оонньуулары салгыы ыытыахха сөп. Оонньуулары ардах да, тыал да тохтотуо суоҕа.
Уус Алдан баһылыга Алексей Федотов:
-Бастаан буурҕа түстэҕинэ, дьон син биир долгуйар. 2009 да сыллаахха эмиэ улахан буурҕа, силлиэ буолбута. Миистикэ диэн эппэппин эрээри, буолуохтаах эрэ сиринэн ааста дии. 15 мүнүүтэ курдук буурҕалаата. 19 киһи эчэйдэ, олортон 3 оҕо. Билигин бары ама туруктаахтар. Бастаан уот ситимин чөлүгэр түһэрии үлэтэ ыытылынна. Былаахтарбыт, баннердарбыт аҕыйаатылар. Ону сөргүтэ сатыахпыт. Суох буоллаҕына, хайдах баарынан баран иһиэҕэ. Буурҕа ааспытын кэннэ чаас аҥаарын иһинэн дьоннор чөлүгэр түһэрэр үлэҕэ таҕыстылар. Ол кэннэ кэмитиэт мунньаҕа ыытылынна. Бырабыыталыстыба бэрэссэдээтэлэ Андрей Тарасенко туох көмө наадатын сураста. Биһиги бэйэбит күүспүтүнэн чөлүгэр түһэрэр кыахтаахпыт. Нэһилиэктэрбит бары көмөҕө туруннулар, кэлэн үлэлии сылдьаллар. Оннооҕор Үөһээ Бүлүү делегацията көмөлөһөр баҕа санаатын биллэрдэ. Ол эрээри, сүрүн өттүгэр эппиэтинэстээх анаммыт дьоннор бааллар. Стадиоҥҥа резервнэй источниктар син биир бааллар. Олор холбонон үлэ бара турар. Саамай сүрүнэ билигин — уоту чөлүгэр түһэрии.
-
4
-
0
-
0
-
0
-
1
-
0
