Издательский дом Редакция Подписка
Погода в Якутске: . -11 oC

Дьокуускайга «Өрөгөй» успуорт уораҕайыгар алтынньы 28-29 күннэригэр ССРС, РСФСР, Саха АССР үтүөлээх тириэньэрэ, Саха АССР үтүөлээх учуутала Д.П. Коркин кэриэһигэр норуоттар икки ардыларынааҕы көҥүл тустуу турнира бэрт үрдүк тэрээһиннээхтик буолан ааста. Тустууну таптааччылар ким «Өрөгөй» киин арыанатыгар, ким күөх экирээнинэн, ким интэриниэт ситиминэн икки күн устата быстыбакка кэтээтэ, кырасыабай тустуу иһин күүскэ ыарыйда.

Дьокуускайга «Өрөгөй» успуорт уораҕайыгар алтынньы 28-29 күннэригэр ССРС, РСФСР, Саха АССР үтүөлээх тириэньэрэ, Саха АССР үтүөлээх учуутала Д.П. Коркин кэриэһигэр норуоттар икки ардыларынааҕы көҥүл тустуу турнира бэрт үрдүк тэрээһиннээхтик буолан ааста. Тустууну таптааччылар ким «Өрөгөй» киин арыанатыгар, ким күөх экирээнинэн, ким интэриниэт ситиминэн икки күн устата быстыбакка кэтээтэ, кырасыабай тустуу иһин күүскэ ыарыйда.

Көбүөр сулустара

Коркин турнирыгар барыта 13 дойдуттан 193 спортсмен кытынна. Саамай ааттаах-суоллаах бөҕөһүнэн Токиотааҕы Олимпиада чөмпүйүөнэ Заурбек Сидаков буолла. Ону тэҥэ Олимпиада, Аан дойду, Европа, Панамерика, Азия кыайыылаахтара, призердара, тарбахха баттанар күүстээх тустууктар көбүөрү киэргэттилэр. Ыҥырыылаах ыалдьыттарынан Азербайджантан Олимпиада кыайыылааҕа Шариф Шарифов, Арассыыйаттан Афины Олимпиадатын кыһыл көмүс мэтээлин хаһаайына, билигин дойду сүүмэрдэммит хамаан­датын кылаабынай тириэньэрин эбээһинэһин толорооччу, хас да сыл Саха Сирин хамаандатыгар сүбэһит быһыытынан сылдьыбыт Хаджимурад Гацалов, Лондоннааҕы Олимпиада чөмпүйүөнэ Джамал Отарсултанов, боруонса призёр Денис Царгуш буоллулар.

корин3

Хаджимурад Гацалов, олимпиада чөмпүйүөнэ, аан дойду 5 төгүллээх, Дьобуруопа 3 төгүллээх кыайыылааҕа, ыҥырыылаах ыалдьыт:   

– Мин Саха сирин тустууктарын кытта биир эрэ сыл үлэлээбэтим. Онон уолаттар кыахтарын билэбин, турунуу күүстээх, настарыанньа бойобуой. Уолаттар бүгүҥҥү туруктарын көрүөхпүт, сыаналыахпыт. Аан дойду геобэлиитикэтинэн сибээстээн, хомойуох иһин, биһиги спортсменнарбыт дойду таһыгар тахсыбаттар. Коркин турнирыгар саҥа тыын биллэр, өрө көтөҕүллүү баар. Тас дойдуттан бөҕөстөр кэлэннэр, уолаттарбыт улахан мотивация ылаллара саарбаҕа суох. Турнир тэрээһинэ үрдүк таһымнаах, маннык хабааннаах күрэхтэһии кэнники сылларга ханна да буола илик. Онон тэрийээччилэргэ улахан махтал! 

Үөрүүлээх аһыллыы

Д.П. Коркин аатынан көҥүл тустууга норуоттар икки ардыларынааҕы турнир үөрүүлээх арыллыытыгар Ил Дархан Айсен Николаев кытынна.  Бу дьоро киэһэ бөҕөстөрбүтүгэр бырабыыталыстыба наҕараадаларын туттардылар. Македония былааҕын көмүскүүр Амматтан төрүттээх Европа чөмпүйүөнүгэр Владимир Егоровка «Гражданскай килбиэн» бэлиэни туттардылар. Польшаттан кыттар, кырылас кумахтаах Бүлүү ыччата Европа икки төгүллээх призёра Эдуард Григорьев уонна Арассыыйа хамаандатын биир лиидэрэ, Иван Ярыгин турнирын кыайыылааҕа Орто Халыматтан силистээх Виктор Рассадин Ил Дархан махтал суругун туттулар. Биллэр-көстөр спортсменнартан ураты, Тыва уонна Хакасия успуордун миниистирдэрэ Субудай Монгуш, Сергей Кочан турнир хаамыытын кэтээтилэр, спортивнай эбийиэктэргэ сырыттылар, успуорт эйгэтигэр өрөспүүбүлүкэ үлэтин-хамнаһын кытта билистилэр.

Турнир арыллыытын спортивнай шоулары иилиир-саҕалыыр Гиви Твалтвадзе ыытта. Кини өссө 2019 сыллаахха Дьокуускайга көҥүл тустууга Аан дойду куубагын ыыппыта.

45

Уолаттарбыт ситиһиилэрэ

Дмитрий Коркин түһүлгэтигэр саха бөҕөстөрө 5 боруонса мэтээли ыллылар. Константинтан ураты Андрей Бекренев (Беларусь), Станислав Свинобоев, Ньургун Сергин, Максим Толмачев (Красноярскай) пьедестал үһүс үктэлигэр таҕыстылар. Маны сэргэ биэс иһигэр Уйгулаан Иванов, Харысхал Григорьев, Владимир Егоров (Македония), Федор Постников,  Дьулусхан Тотонов, Тимур Николаев, Константин Власов, Андриан Ленскэй, Софрон Софронов киирдилэр.  

Турнир саамай күүтүүлээх түһүлгэтэ бастыҥнары быһаарар хапсыһыылар буоллулар. «Өрөгөй» өтөрүнэн туолбатаҕын туолан, ытыс тыаһынан өрө хабылла, ыһыынан-хаһыынан ньиргийэн олордо.

222

57 кг киирсиини саамай бүтэһик ыыттылар. Уус Алдантан төрүттээх, Белоруссия былааҕын көмүскүүр Арыйаан Тютрин Кубаттан кэлбит Андреу Рейнери Ортеганы кытта кыһыл көмүс мэтээл дьылҕатын быһаардылар. Инники эргиирдэргэ Арыйаан Любомир Ашеины, Таджикистантан Азия кыайыылааҕын Мухаммад Икромовы, Белоруссияттан Димчик Батамункуевы, Уйгулаан Иванову кыайталаан финал чааһыгар тахсыбыта. Тютрин Ортеганы 2019 сыллаахха Аан дойду куубагар кыайан турар. Онон уолбутугар эрэл улахан этэ. Икки период устата Арыйаан 1-2 хотторон испитэ. Хапсыһыы бүтүө 30 сөкүүндэ хаалбытыгар олус наадалаах хамсаныыны оҥорон, кубинец кэннигэр тахсан, кыайыылаах икки баалы сурунна. Кыайыылаах – Арыйаан Тютрин! Санатар буоллахха, Арыйаан Коркин көбүөрүн 2018 сыллаахха Арассыыйа хамаандатын састаабыгар кыттан кыайан турар. 

Бастыҥ бөҕөс

Турнир түмүгүнэн ыалдьааччылар 550 гр үрүҥ көмүстэн куттаран оҥорторбут борцовкаларын көрөөччүлэр быһаарыыларынан «Бастыҥ бөҕөскө» диэн ааттаан туран, олимпиада чөмпүйүөнэ, Коркин турнирын кэлэн киэргэппит уонна үрдүк кылаастаах бастыҥ тустуутун көрдөрбүт Заурбек Сидаковка туттардылар. Кини Саха сирин түһүлгэтигэр да тэҥнээҕин булбата. Финалга Европа чөмпүйүөнүн  Курбан Шираевы сабырыйда. 

коркин3

Заурбек Сидаков, турнир кыайыы­лааҕа:

– Бэртээхэй турнир буолла! Ыалдьааччылар биһирэбиллэрин ылан, үрүҥ көмүс борцовканы тутаммын сүөм үрдээтим. Бороцовкабын өйдүү-саныы сылдьар гына саамай көстөр сиргэ туруоруом.Сахалар тустууну өрө туталлара тута биллэр, онон саха норуотугар хайаан да Олимпиада чөмпүйүөннэрэ кэлиэхтэрин баҕарабын. Мин Дьокуускайга көрөөччүлэри үөрдээри кэлбитим уонна ол сыалбын ситэммин, астынан турабын. Олимпиада кыайыылаахтара Саха сиригэр күн аайы кэлбэттэр. Оҕо сылдьаммын чөмпүйүөннэри көрүөхпүн наһаа баҕарар этим, саатар, илии тутуһуохпун. Ол иһин хаартыскаҕа түһүөн, кэпсэтиэн баҕалаахтары наһаа өйдүүбүн, кимиэхэ да аккаастаабаппын.

Кэлэр турнирдарга 79 кг тустуом. Билиҥҥи балаһыанньа спортсменнары атахтаата. Боксердар дойду таһыгар кыттарга көҥүллээхтэр, онон тустууктары да көҥүллүөхтэрэ диэн эрэнэ күүтэбит. Ыалдьааччыларга, тэрийээччилэргэ, миигин ыҥырбыт норуот дьокутаатыгар, атаспар Виктор Лебедевкэ улахан махталбын биллэрэбин!

Эһиил улуу тириэньэр Д.П. Коркин 95 сааһын бэлиэтиэхпит. Онон быйылгы турнир кэлэр сыл үбүлүөйдээх тэрээһинигэр бэлэмнэнии да курдук ыытылынна.

Дьэ, чахчы, аан дойду таһымыттан туох да итэҕэһэ суох күүстээх састаабы түмэ тарпыт Коркин көбүөрэ эрийсиилээх киирсиилэринэн, хабыр хапсыһыытынан өтөргө диэри кэпсэл буолар дьоһун түһүлгэнэн ааҕыллара саарбаҕа суох.

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
Лента новостей

Суоппар буолар уустугурда

Муус устар 1 күнүттэн байаҥкамаат бэбиэскэтиттэн куотунар дьону тырааныспары ыытар…
28.03.24 17:19
Лента новостей

Интерактивнай быыстапка

«Арассыыйа – Мин устуоруйам» мультимедийнай устуоруйа пааркатыгар кулун тутар 20 күнүттэн…
28.03.24 16:23