Аҕата көҥүл тустууга аан дойду таһымнаах успуорт маастара кыыһын харбыырга, күрэхтэһэргэ, тулуурдаах, дьулуурдаах буоларга, туруоруммут сыалы хайаан да ситиһэргэ үөрэтэр. Ийэтэ кыыһын хаалларан барбытыгар бэйэтин буруйдана санаан, аттыттан арахпакка, кини уҥа-хаҥас илиитэ, көмөлөһөөччүтэ, өйөөччүтэ буолар.
Сайыҥҥы паралимпийскай оонньуу үрүҥ көмүс призера, аан дойду уонна Европа чөмпүйүөнэ Анастасия Диодорова олоҕун көрдөрөр "Диодорова. Сүүрүк утары" спортивнай байопик премьерата бэҕэһээ «Лена» киинэ тыйаатырыгар буолан ааста. Саалаҕа дьон тобус-толору муһунна, киинэ бастаан трагедияттан саҕаланар эрээри, сыл-хонук ааспытын кэнниттэн дьиэ кэргэн иһигэр күлэ-үөрэ, бэйэ-бэйэлэрин дьээбэлэһэ сылдьаллар, онон кыыс олоххо интэриэһэ уостубакка, спортивнай карьератын саҕалыырыгар үктэл буолар.
Илиитэ суох диэн аны оскуолаттан, бассыайынтан үүрэ сатыылларын үгүс көрөөччү ытыы-ытыы көрдө. Ол эрэн киинэ олоххо тулхадыйбат күүстээх эрэли, кыайыыга дьулуһууну саҕар. Кыыс тириэнньэрэ Татьяна Арнтгольц охтон баран хайаан да туран салгыы барарга, инниҥ диэки күрдьэн иһэргэ үөрэтэр.
Режиссер Сандал Баишев уонна сүрүн оруоллары толорбут артыыстар көрөөччү маҥнай хараҕын уутун тоҕорун, онтон кыайыы, өрөгөй, үөрүү долгунугар куустарарын курдук киинэ ис хоһоонун арыйдылар.
Киинэ кэнниттэн көрөөччүлэр ойон туран дохсун ытыс тыаһынан биһирээбиттэрин биллэрдилэр, сүрүн дьоруойдары Анастасия уонна Людмила Диодоровалары кытта хаартыскаҕа түстүлэр.
Настя Диодорова киинэни көрөн баран астыммытын биллэрдэ, олоххо буолбут трагедияны деликатнайдык көрдөрдүлэр, уус-уран киинэҕэ режиссер бэйэтин көрүүтэ баар эрээри, улахан аҥаара дьиҥ олохтон уһулунна диэн эттэ. Кини уруккутун курдук Москубаҕа олорор, СӨ харбааһыҥҥа федерациятыгар адаптивнай хайысханы сайыннарарга онлайн үлэлиир.
Киинэ төһө даҕаны трагичнайын иһин киһиэхэ сырдык санааны саҕар, туруоруммут сыалгар хайа үрдүгэр туран кыырайа көтөргөр кынат үүннэрэр.
Ааптар хаартыскаҕа түһэриитэ.
-
2
-
1
-
0
-
0
-
0
-
0
