Билигин Краснодарскай кыраай Армавир куоратыгар олохтоох Дмитриев Реферий Михайлович 80 сааһыттан лаппа тахсыбыт, эдэригэр бэрт сытыы-хотуу киһи биир түгэни кэпсээн ааспытын өйдөөн хаалбыппын.
Докторов Никиитэ Көстөкүүнэбис ол кэмҥэ Исидор Барахов колхуос бэрэссэдээтэлин солбуйааччытынан үлэлиир эбит.
Реферийдаах Нам оскуолатын улахан кылааһыгар үөрэнэ сылдьаллар эбит. Оскуола залыгар тустар оҕолору оскуола учуутала көҥүл тустууга Республика чемпиона, Григорьев Кирилл Петрович эрчийэр эбит.
Реферийдээх бииргэ үөрэнэр уолаттарын кытта сүбэлэһэн баран, бу икки күүстээх дьону тиксиһиннэрэн, туһуннаран көрөргө санаммыттар. Кинилэр колхуос хонтуоратыгар тахсан Никиитэ Көстөкүүнэбискэ киирэн Кирилл Петрович эйигин былыргы тустуук аныгы тустуу ньымаларын билбэт, билиҥҥи тустууктары кытта тустан тэҥнэһэр кыаҕа суох диир диэбиттэр.
Уолаттар Кирилл Петровичка эмиэ Бычырдаан эн тускунан ахсарбаттык саҥарар диэн тууһаан биэрбиттэр.
Ити кэмҥэ Кирилл Петрович тустар оҕолору атахтаан охторуу ньыматын көрдөрө сылдьар эбит.
Бэрт сотору Никиитэ Көстөкүүнэбис киирэн кэлбит даҕаны оҕолору дьарыктыы сылдьар Кирилл Петровичка тиийэн эн көрдөрөр ньымаҕар киһи охтубат диэн эппит.
Онуоха Кирилл Петрович атахтатан баран хайдах киһи охтуо суоҕай диэн хардарбыт.
Никиитэ Көстөкүүнэбис атаҕын биэрбит уонна чэ миигин охторон көрдөр диэбитин, Кирилл Петрович киһитин атаҕын ылан өрө тардан быраҕыах курдук буолан эрдэҕинэ, Никиитэ Көстөкүүнэбис атаҕынан олуйан төлө тэбэригэр, Кирилл Петрович киһитин атаҕын төлө тутан көбүөр кытыытыгар охтубута диэн Реферий кэпсээнин түмүктээбитэ.
Бу Реферий Михайлович кэпсииригэр, 1991 сыллаахха Дүллүкү сопхуос парткомун сэкэрэтээринэн үлэлии сылдьан, кини эдьиийигэр, Балаҕаннаахтан төрүттээх Дмитриева Анфиса Михайловнаҕа олорор этим.
Дьиҥэр ити кэмҥэ суолта биэрэн Никиитэ Көстөкүүнэбистэн бу туһунан ыйыппакка хаалбыппын.
Ол эрэн арааһа "Эдэр коммунист" хаһыакка Кирилл Петрович үөрэҕирии, спорт боппуруостарыгар суруйуутугар Докторов Н.К. - Бычырдаан атаҕа кытаанаҕа бэрт эбит этэ диэн суруйбутун булан аахпыппын өйдүүбүн, ол хаһыаты бибилэтиэкэ архыыбыгар баар буоллаҕына булан ааҕар киһи диэн баҕа санаа баар.
Степан Дмитриев
Үөһээ Бүлүү улууһун Балаҕаннаах нэһилиэгин баһылыга
Саха Республикатын норуотун хаһаайыстыбатын үтүөлээх үлэһитэ.
-
0
-
0
-
0
-
0
-
0
-
0
