«Устудьуоннуур кэмнэрбитигэр мас тардыһыытыгар сонун хамсаныылары киллэрэн, успуорт аныгы көрүҥүн быраабылаларын олохтоон, чочуйан биэрбиппит. Мас тардыһыыта – дьикти көрүҥ! Күөн көрсөөччүгүн кытта этиҥ-сииниҥ бараныар диэри иэмэхтэһэн киирсэн баран, күрэх бүттэ да истиҥ доҕор, аллар атас буолаҕын. Ол курдук, саҥаны саҕалаабыт, сонун сүүрээни быһаччы киллэрсибит Георгий Ионович Цыпандин, Петр Иванович Кривошапкин, Петр Дмитриевич Каратаев, Алексей Трофимович Афанасьев, Дмитрий Иннокентьевич Шарин, Владимир Яковлевич Шарин буоламмыт күн бүгүҥҥэ диэри доҕордуу сыһыаннаахпыт».
Хатас нэһилиэгин дьаһалтатын салайааччыта Евгений Петрович Пермяков эмиэ мас тардыһыытынан сөбүлээн дьарыктанар.
«Уолаттары кытта спортивнай саалаҕа дьарыктана сырыттахпытына Евгений Гоголев ыҥыран ылан, мас тардыһыытын туһунан кэпсээбитэ, бастакы интэриэһи уһугуннарбыта. Маҥнайгы күрэхтэр көрүү-истии, үөрэнии быһыытынан ааспыттара, онтон кыра-кыралаан миэстэбит үрдээтэр үрдээн, призер буолан, чөмпүйүөн кыһыл лиэнтэтин кэппиппит.
Александр Чиряев, Дмитрий Местников, Семён Ногнорутов, Леонид Окоемов, Константин Иванов бары биир кылааска үөрэнэр оҕолор тутуспутунан мас тардыһыытыгар сылдьыбыппыт. Манна өркөн өйгүнэн тобулан, хамсанан-имсэнэн, оҥорон-тутан кыайаҕын. Мас тардыһыыта быыппастар былчыҥы, күүһү-уоҕу биэрэрин таһынан, ис-тас туругуҥ биир таһымҥа киирэр дии саныыбын», — диэн санаатын үллэстэр.
-
1
-
0
-
0
-
0
-
0
-
0
