Биһиги Үөһээ Бүлүүтээҕи айылҕа харыстабылын инспекциятын салайааччытыгар Василий Васильевич Титовка тахсан сонуну ыйыталастыбыт.
-- Мииринэй оройуонугар Чернышевскайга баар балык собуотуттан быраҥаатта ыаматын ылар туһунан дуогабар түһэрсэн, ону олоххо киллэрэн, бөлүүн собуот салайааччыта Василий Александрович Черепанов уонна өрөспүүбүлүкэ тустаах инпекциятын үлэһиттэрэ буолан ыамалары аҕалан икки күөлүнэн ыыттыбыт. Харбалаах сиригэр баар Тимир Күндэ күөлгэ 150 тыһыынча уонна Өргүөт нэһилиэгэр баар ИП Новиков бас билэр Дириҥ Мара күөлүгэр 50 тыһыынча быраҥаатта ыаматын ыыттыбыт. Бу күөллэр балык төрөөн-ууһаан үөскүүрүгэр табыгастааҕын Хотугу прикладной экология института чинчийэн быһаарбыта. Күөллэр дириҥнэр, үрэххэ тахсар ситимнэрэ, хоруулара суох. Онон балык ханна да устан хаалбакка, тэнийэригэр усулуобуйа баар. Ыамалар улаатан, төрөөн ууһан дьиэтийэр кэмнэригэр олох тыыппаппыт, 4-5-с сылларыгар балыктыыр көҥүллэниэҕэ. Онуоха диэри биһиги инспекциябыт кэтиэҕэ, көрүөҕэ-харайыаҕа.
-
0
-
0
-
0
-
0
-
0
-
0
