Тэрээһиннэргэ уопсайынан өрөспүүбүлүкэ 20 улууһуттан 237 дэлэгээт муһунна, ол иһигэр 12 улуус бэйэлэрин табаларын илдьэ кэллилэр. Ону тэҥэ, Кытайтан, Монголияттан ыалдьыттар, Арассыыйа Федерациятын Тыа хаһаайыстыбатын министиэристибэтин бэрэстэбиитэллэрэ кытталлар.
Сүрүн болҕомтону тэрээһин дьыалабыай өттүгэр, чуолаан Сүрүн мунньаҕы, «XXI үйэ иккис чиэппэригэр хотугу дьиэ табатын иитии» (Северное домашнее оленеводство во второй четверти XXI века) диэн тиэмэлээх төгүрүк остуолу, сэминээрдэри ыытыыга уурдулар. Манна төрүт дьарыгы харыстааһын, ыччаты табаны иитиигэ тардыы курдук уонна о.д.а. тыҥаан турар кыһалҕалары быһаарсыахтара.
Сийиэс чэрчитинэн Василий Михайлович Кладкин аатынан судаарыстыбаннай бириэмийэни туттарыахтара. Тэрээһин кыттыылаахтарыгар анаан АГАТУ-га кылгас болдьохтоох таһымы үрдэтии кууруһа, быраастарга көрдөрүү ыытыллар.
Маны таһынан, «Көс олох эйгэтэ» күрэс-быыстапка, оҕолорго «Хотугу таба» уруһуй күрэҕэ, хотугу норуоттар төрүт таҥастарын көрдөрүү, «Бастыҥ таба көлүүрэ» көрүү-күрэх, төрүт оҥоһуктар быыстапка-дьаарбаҥкалара саҕаланнылар.
«Көһө сылдьар табаһыт дьиэ кэргэн» өрөспүүбүлүкэтээҕи куонкурус интэриэһи тардыаҕа. Табаһыт дьиэ кэргэттэр 7 номинациянан күрэстэһэллэр. Кыайыылаахтарга Саха Өрөспүүбүлүкэтин Ил Дарханын 300 тыһыынча солкуобайдаах бириэмийэтэ, иккистэргэ – 200 тыһ. солк., үһүстэргэ – 100 тыһ. солк. туттарыллыахтара. Быйылгы өрөспүүбүлүкэтээҕи куонкуруска 8 улуустан кыттыахтара. Ол курдук, Нерюнгри, Муома, Анаабыр, Булуҥ, Өлөөн, Кэбээйи, Томпо, Эбээн Бытантай улуустарын бэрэстэбиитэллэрэ күөн көрсүөхтэрэ.
Ордук чаҕылхай түгэнинэн сарсын , кулун тутар 20 күнүгэр Сайсары күөлүгэр Табаһыттар оонньуулара буолуоҕа. Манна 14 улуустан хамаандалар кыттыахтара. Кыайыылаах хамаандаҕа АЛРОСА хампаанньаттан «Урал» баахтабай массыынаны туттарыахтара. Иккис миэстэҕэ Ил Түмэн дьокутаата, “Саханефтегазсбыт” АУо генеральнай дириэктэрэ Виктор Лебедев туруорбут УАЗ-фургон массыыната, үһүс миэстэҕэ тахсыбыт хамаандаҕа СӨ тыа хаһаайыстыбатын министиэристибэтин “Бурана” тиксиэхтэрэ.
Оттон кулун тутар 21 күнүгэр Өксөкүлээх Өлөксөй аатынан Норуоттар доҕордоһууларын дьиэтигэр сийиэһи үөрүүлээхтик сабар улахан кэнсиэр буолуоҕа.
Сайсары күөлгэ араас улуустартан кэлбит табаһыттар бэйэлэрин улуустарын, үлэлэрин-хамнастарын билиһиннэрэр былаһааккаларын тэрийэн дьон кэрэхсэбилин ылыахтара, норуот маастардарын быыстапката буолуоҕа, улуустартан кэлбит самодеятельнай артыыстар кэнсиэрдиэхтэрэ, күрэхтэһиилэр ыытыллыахтара.
Ити курдук, табаһыттар өрөспүүбүлүкэтээҕи IV сийиэстэрин чэрчитинэн ыытыллар суолталаах тэрээһиннэр бу нэдиэлэ устата быыстала суох бара тураллар.
Хаартыска: ЯСИА
-
1
-
0
-
0
-
0
-
0
-
0
