Сэргээ

 Дьокуускай куораппыт пааркаларын кэрийэн, хайдах үлэлииллэрин, сынньалаҥ ханнык көрүҥнэрэ баарын билистим.

         «Үрдэл»

“Үрдэл” паарка куорат кытыытыгар баар буолан, үксүн массыыналаах дьон тиийэр. Оптуобуһунан барар буоллахха, 18-с №-дээххэ олорсон, бүтэһик «Карьер» диэн тохтобулга түһэҕин, онтон добуочча ыраах сатыы хаамаҕын. Мыраан үрдүгэр тахсыы бэйэтэ туһунан физическэй ноҕурууска, эрчиллии буолуон сөп.

      Паарка үлэтэ сарсыарда 11 чаастан саҕаланар. Эрдэ тиийдэххэ, тарбахха баттанар ахсааннаах аҕыйах киһи баар буолар. Онон дьон мунньустуутун соччо сөбүлээбэт буоллаххытына, сарсыардаттан хомунарга сүбэлиибит.

Киирии билиэт күнүттэн уонна бириэмэтиттэн тутулуктаах. Ол курдук,  сыаната 6-12 саастаах оҕолорго -- 250 солк., 13 саастарыттан үөһэ саастаахтарга – 300 солк. Бэнидиэнньиктэн чэппиэргэ диэри сарсыарда 11.00 ч. күнүс 15.00 чааска диэри кэллэххэ, оҕо уонна улахан киһи киириитин сыаната 50 солкуобайынан чэпчиир. Биэстэриттэн кыра саастаах оҕолор босхо ааһаллар. Устудьуоннарга, биэнсийэлээхтэргэ уонна элбэх оҕолоох ыалларга 50% чэпчэтии көрүллэр. Төрөөбүт күннээхтэргэ, инбэлииттэргэ, тулаайах оҕолорго -- киирии босхо. Саамай сүрүнэ – убуорунайдара туспа сылаас дьиэҕэ баар.

«Үрдэлгэ» хайыһар, хаҥкы уларсыыта -- 200 солкуобай. Болдьоҕо суох, күнү быһа да илдьэ сылдьыахха сөп. Катокка бэйэҥ хаҥкыгын кытта киирэргэ -- 100 солк. Сырылыыр ледянканы уларсыы – 50 солк. «Высота» диэн эрэстэрээҥҥэ аһыахха сөп. Хоно-өрүү хаалааччыларга дьиэ куортамныыллар. Сууккаҕа -- 10000-12000 солк.

Фантастика сүгүрүйээччилэрэ «Звездные войны» киинэҕэ баар истребители үтүктэн оҥорбут көтөр аалларын анаан-минээн көрө кэлэллэр эбит. Куйаартан саҥа кэлэн түспүт курдук, хонуу ортотугар турар. Бу арт-эбийиэги былырыын Айаал Федоров хамаандата туруорбут. Ити иннинэ «Звездные войны» атын хараабыла баара. Күүстээх тыалга мыраантан сууллан түһэн, бу саҥаны оҥорон, фанаттары өссө төгүл үөрдүбүттэр.

“Хотугу дьүкээбил”

Саамай элбэх киһи «Хотугу дьүкээбил» муус пааркаҕа сылдьар эбит.

Манны ледянканы уларсыы – 50 солк, оттон хаҥкыны -- 150 солк. Пааркаҕа дуоһутуу араас көрүҥэ баар: аты миинии, акка биитэр табаҕа сыарҕанан состоруу, бинтиэпкэнэн сыалы ытыы, сүүйүүлээх оонньуулар, «Ветерок» диэн аттракцион. Карусель 2 мүнүүтэ эргитэригэр 100 солкуобай.

Муус «чааскыга» киирэн, ханааттан тутуһунан тахсарга холонуохха, «банаанынан», квадроциклынан, снегомотоходунан хатааһылыахха, тюбинг, зорб ылан сыыртан сырылыахха сөп.

Ускуустубаны кэрэхсиир дьоҥҥо манна наһаа үчүгэй хаар уонна муус оҥоһуктар бааллар. Бу оҥоһуктарга биһиги биллиилээх дьону, мультфильм, киинэ уонна кинигэ дьоруойдарын көрүөхпүтүн сөп.

Ол курдук, Чарли Чаплиҥҥа, Былатыан Ойуунускайга тиийэ дьүһүйүллүбүттэр. Холобура, биир скульптураҕа Джеймс Кэмерон устубут киинэлэрин дьүөрэлээбиттэр: «Титаник» устар аал үрдүгэр Терминатордаах Тор охсуһа сылдьаллар.

Икки паарка кафеларын аһылыгын тэҥнээн көрдөххө, минньигэстэр, хайатын да сэмэлиир кыахпыт суох. Арай сыаналарын тэҥниэххэ сөп.

“Үрдэл” (сыаната күөҕүнэн),  “Хотугу дьүкээбил” (кыһылынан)

Бэрэски

100 солк.

60 солк.

Беляш

110 солк.

80 солк.

Тиэстэҕэ сууламмыт сосиска

100 солк.

80 солк.

Кофе

120-200 солк.

50-100 солк.

Чэй

50-300 солк.

30-150 солк.

Көстөрүн курдук, сыана араастаһыыта син биллэр. Баҕар, ким эмэ: «Төлөөн киирэн баран, итиччэ сыаналаах аһы аһыам дуо?» -- диэ. Ол эрээри куорат дьоно маны уоскулаҥ, оҕону сэргэхситэр, аралдьыйар сир иһин төлөбүр курдук ылына үөрэммиттэр.

Куорат киин паарката

Бу миэстэни бары билэбит. Үчүгэйэ диэн, манна киириитэ босхо. Хайыһардьыттар, хаалыктаах хаамааччылар, сүүрүктэр, оҕо аймах сөбүлээн сылдьар сирэ. Куорат ортотугар баар буолан, дьон тиийэригэр да табыгастаах.

Хайыһары 1,5 чааска оҕолорго 100 солк., улахан дьоҥҥо 150 солк. уларсаллар. Аһыыр, иттэр, тахсан киирэр сир, хомойуох иһин, суох. Хааччахтааһыннар сымнааннар, 2 сыл үлэлээбэккэ турбут аттракционнарбыт  быйыл баҕас үлэлиир инилэр диэн эрэллээхпит.

Туох кистэлэ кэлиэй, Дьокуускайбытыгар маннык пааркалар, сквердэр суохтарын тэҥэ. Онон туох да үлэлээбэт да кэмигэр манна дьон тоҕуоруһар. Сорохтор оннооҕор тииҥнэри аһатаары эрэ кэлэллэр. Көр, дьоҥҥо күөх эйгэ, айылҕалыын алтыһар оннук суолталаах.

Хаҥкылыыр сирдэр

Билигин Сайсары күөлгэ, Ленин болуоссатыгар, Таалай күөлгэ уо.д.а. хаҥкылыыр сирдэр оҥоһулуннулар.

Таалай катогар хаҥкы уларсар чааһа 200 солк. Ленин болуоссатыгар -- 150 солк.

Бу кэмҥэ «Эллэй Боотурга» сылдьар, төттөрүтүн, ордук буолар: киһи аҕыйах. Киириитэ улахан дьоҥҥо – 300 солк., оҕолорго -- 200 солк. Хаҥкыны уларсар оҕолорго – 150 солк., улахан дьоҥҥо -- 250 солк.

Үчүгэйэ диэн, таһырдьа курдук тымныы буолбатах. Сирэйгин сааскы салгыҥҥа оҕустаран, күҥҥэ сиэтэн хараарбаккын. Хамсанарга сөптөөх гына чараас соҕустук таҥнан кэлэҕин. Кафе үлэлиир.

Түмүктээн эттэххэ, 10-15 сыллааҕыта маннык үчүгэй пааркалар суохтара. Дьон сылдьарын, харчы хамсыырын иһин, туризм бу көрүҥэ, урбаан бу салаата сыыйа сайдан иһэр. Онон олохтоох дьоҕус биисинэһи өйүү, бэйэбит дуоһуйа сынньана таарыйа, бачча сааска дьиэҕэ бүгэн олорбокко, салгыҥҥа сылдьыаххайыҥ.

Өксөөн Гурьев.