Уопсастыба

Форум ZOOM платформаҕа буолла. Онон кыттааччылар быһа кэпсэтэр, ыйытыылары биэрэр кыахтаннылар. Барыта 16 спикер билиҥҥи кэмҥэ саамай наадалааҕы – харантыыҥҥа хаайтарбакка, хайдах бэйэ дьыалатын тэрийэр, бэйэни сайыннарар туһунан кэпсээтилэр. Чахчыта да, уларыта тутуу буолбутугар, ырыынакка киирии быыһык бириэмэтигэр, Сэбиэскэй Сойуус эстэн, ыһыллыы-тоҕуллуу, үлэ суох кэмигэр үгүс-үтүмэн дьахтар, дьиэ кэргэнин аһатаары-таҥыннараары, улахан бауллары тута-тута, челнок-атыыһыт буолбуттара. Ол тэҥэ, бу билигин харантыын кэмигэр эмиэ дьахталлар барахсаттар биир бастакынан, саҥаны-сонуну толкуйдуу охсон, онлайн эрэсииминэн үлэлээн, араас куурустары, сэминээрдэри, маастар-кылаастары, дьарыктары тэрийэн, астаан-тигэн, эбии дохуот аахсарга кыһаллаллар.

Холобура, урбаанньыт Анастасия Кузнецова пандемия кэмигэр фулфилмент киинин тэрийбит. Ол эбэтэр табаары атыылаһааччыга диэри тиэрдиигэ, харайыыга, учуоттааһыҥҥа өҥөнү оҥорор буолбут. Кини: “Тугу эмэ оҥорорго сананныгыт эрэ, өр толкуйдуу барбакка, тута холонон көрөр буолуҥ. Ким да тылын истимэҥ. Аны туран, дьарыктанар эйгэҕитин буолбакка, онтон кэлэр барыһы сөбүлээҥ, онно интэриэстээх буолуҥ. Биисинэс-былаан эҥин диэн улахан суолтата суох, кылаабынайа, харчы эргиирин бастакы күҥҥүттэн суруйан иһэр буолуҥ. Бастакы биисинэскитин хаһан да кирэдьиит киирэн арыйымаҥ. Бэйэҥ мунньунуулаах эрэ буоллаххына саҕалаа”, -- диэн сүбэлээтэ.

Бу харантыын кэмигэр үгүстэр, иллэҥсийбиччэ, дьиэҕэ олорбучча, бэйэлэрин сайыннарыынан дьарыктаннылар. Онуоха араас куурустар, сэминээрдэр онлайн эрэсииминэн быыстала суох ыытылла тураллара хайҕаллаах. Холобура, Евгения Местникова уонна Туяра Шадрина салайар “Тайм-спринт” кулууптара дьахталларга анаан, бириэмэни сөпкө аттарарга,  былаанныырга, күнү туһалаахтык атаарарга; сүрэҕэлдьиир, мээнэ-мээнэ аһыыр, табахтыыр курдук куһаҕан дьаллыктары үчүгэй үөрүйэхтэргэ кубулутарга (холобура, сүүрэргэ, аһылыгы көрүнэргэ, кинигэ ааҕарга, о.д.а); олох устар сүүрүгүн сөпкө салайарга уһуйар онлайн-марафоннары ыыталлар.

Кэрэхсэбиллээҕэ диэн, бу форумҥа үс министиэристибэ салайааччыта кыттыыны ылла.

СӨ Инновацияҕа уонна информационнай технологияларга миниистирэ Анатолий Семенов: “Кылгас кэм иһигэр биһиги Интэриниэт сүдү күүһүн, аныгы технологиялар баһылыыр өрүттэрин илэ бэйэбитинэн биллибит. Дьиэттэн да тахсыбакка, аһы-үөлү сакаастаан ылыахха, үрдүк үөрэххэ уһуйуллуохха сөбүн дьон өйдөөтө. Урут биир мунньах аайыттан Москубаҕа барарбыт, бүддьүөккэ ороскуот бөҕөтө буолара. Билигин оннук сугулааннары дойду ханнык баҕарар муннугуттан тэрийиэххэ сөбүн бары билиннибит. Онон бу дьаҥ атын кэми арыйда, сыыппыра үйэтин саҕалаата”, -- диэн, куһаҕан да үчүгэйдээҕин бэлиэтээтэ.

СӨ Үөрэххэ уонна наукаҕа миниистирэ Михаил Сивцев онлайн-үөрэх туох да харгыһа суох барбытын, онуоха ийэлэр улахан сыраларын уурбуттара тирэх буолбутун бэлиэтээн, дьахталларга махтанна. “Ол эрээри син биир учууталы илэ көрөн олорор үөрэнэр быдан көдьүүстээх дии саныыбын”, -- диэн санаатын үллэһиннэ.

Оттон СӨ Урбааҥҥа, туризмҥа уонна атыыга-эргиэҥҥэ миниистирэ Ирина Высоких бу уларыйыыга бастакынан дьахталлар, харантыыҥҥа хаайтарбакка, олох саҥа ирдэбилин ылынан, сонун хайысхалары тутуһан, тус дьыалаларын билиҥҥи балаһыанньаҕа табыгастаахтык тэринэн, биисинэстэрин тохтоппокко сайыннара сылдьалларын хайҕаата. “Онуоха биһиги министиэристибэбит урбаанньыттарга, бэйэ тус дьарыктаахтарга көмөнү оҥорор”, -- диир.

Сиһилии “Ил Түмэн” бэс ыйын 12 күнүнээҕи нүөмэригэр ааҕаарыҥ.