Бүгүҥҥү туругунан, өрөспүүбүлүкэ үрдүнэн “хоруонаҕа” сутуллубут киһи ахсаана 2822 киһиэхэ тэҥнэстэ. Ааспыт сууккаҕа – 69 киһи ыарыйда, ол иһигэр Дьокуускайга – 57, Мииринэйгэ – 6. Тааттаҕа – 2, Үөһээ Бүлүүгэ – 2, Намҥа – 1.
Номнуо хаһыс да күнүн субуруччу балыыһаттан үтүөрэн тахсыбыт киһи ахсаана сууккаҕа ыалдьыбыт киһи ахсаанын куоһарар. Бүгүҥҥү дааннайынан, өрөспүүбүлүкэ балыыһаларыттан 78 киһи эбии үтүөрэн тахсыбыт.
Күн бүгүн өрөспүүбүлүкэҕэ ыарыы тарҕаныытын кээписиэнэ 0,89 %-ҥа диэри түспүт. Ыарыһах ахсаанын эбиллиитэ – 2 %-ҥа диэри аччаабыт.
“Бу үчүгэй көрдөрүүлэр бэс ыйын 15 күнүттэн хааччахтааһын сорох көрүҥнэрин уһуларга кыаҕы үөскэтэллэр. Ол гынан баран хааччахтааһыны эмискэ уонна бүтэһиктээхтик устар туһунан этэрбит эрдэ”, – диэн Ил Дархан бэлиэтээтэ.
Айсен Николаев өрөспүүбүлүкэ кылаабынай санитарнай бырааһа киллэрбит этиилэрин үөрэтэн баран, бүгүҥҥү күн бүтүөр диэри сөптөөх быһаарыныылары ылынан, харантыынтан тахсарга туһуламмыт миэрэлэр тустарынан ыйаахха илии баттаныахтааҕын кэпсээтэ.
“Өссө төгүл сэрэтэбин, билиҥҥитэ аһара уоскуйарбыт эрдэ. Билигин даҕаны ыарыы кэккэ улуустарга күөдьүйэн тахса турар. Сүрүннээн, Мииринэйгэ. Дьокуускайга балаһыанньа, төһө да ыалдьыбыт киһи ахсаана 57 диэри түспүтүн үрдүнэн, олус уустук. Санатан аһардахха, ыарыы күөдьүйэрин саҕана, ыам ыйын 20 күнүгэр, киин куоракка сууккаҕа 30-40-нуу киһи ыалдьар этэ. Онон билигин ол ыам ыйын 20 күнүнээҕи көрдөрүүлэргэ тахса иликпит”, – диэн Ил Дархан быһаарда.
Брифинг бүтүүтэ Айсен Николаев хааччахтааһын эрэсиимэ өссө төһө эмэ кэм устата туруо диэн бэлиэтээтэ. Ол эрэн, бары хайысхаларынан үчүгэй динамика баарын эмиэ тоһоҕолоон эттэ.
Өрөспүүбүлүкэ оперативнай штаба иһитиннэрэринэн, ааспыт сууккаҕа 65-тэн үөһэ саастаах икки ыарыһах олохтон туораабыт. 17 киһи ыарахан туруктаах.
Бэс ыйын 11 күнүнээҕи дааннайынан:
“Хоруонаҕа” сутуллубут киһи ахсаана – 2822
Үтүөрбүт – 1589
Өлбүт – 19
-
0
-
0
-
0
-
0
-
0
-
0
