Уопсастыба

Бу киин сыл устата Саха сирин оҕолорун мунньан үөрэтэр, сайыннарар. Манна ыытыллар араас бырайыактарга, үөрэхтэргэ кыттан оҕолор олус сайдаллар, билиилэрэ-көрүүлэрэ улаатара, таһымнара үрдүүрэ чуолкай. Волонтерскай хамсааһыҥҥа анаммыт быйылгы аахсыйаҕа биһиги оҕолорбут бэйэлэрин уопуттарын сырдатан, тарҕатан кэллилэр. Ол туһунан маннык кэпсээтилэр.

– Биһиги уон түөрт хонук “Сосновай Бор” кииҥҥэ сырыттыбыт, барыта сүүстэн тахса оҕо баара. Барыбытын этэрээттэргэ араарбыттара. Баһаатай анаабыттара. Биһиги баһаатайбытынан КВН оонньуу актыбыыһа Максим Станиславович анаммыта. Этэрээппитигэр 30 этибит. «СССР» ол эбэтэр «Союз самых смелых ребят” диэн ааттаммыппыт. Күннээҕи эрэсиим барыта чуолкай, сарсыарда 9.30 ч. сэрээккэ, аһылык, онтон үөрэх саҕаланар. Английскай тылынан саҥарыы, уруһуй, вокал, мир эмоций, 3Д моделирование курдук наадалаах дьарыктар буолаллар. Биһиги вокалга сырыттыбыт, “Алые паруса”, о.д.а. ырыалары сөбүлээн ыллаатыбыт. Быыһыгар лиэксийэ иһиттибит. Доруобуйаны көрүнүү чааһыгар туус хоһугар, спорт саалаҕа дьарыктанныбыт. Күнүттэн киэһэ станцияларынан оонньуулар тэриллэллэр. Онон төрүт чуҥкуйбакка сырыттыбыт, араас оҕолору кытта билсэн, санаа атастаһан, билии- көрүү өртүнэн сайдан кэллибит.

– Уолаттар, дьэ кыайыы-хотуу буолан кэллигит дии, учууталларгыт, оскуолаҕыт аатын ааттаттыгыт. Кэпсээҥ эрэ, тугу гынан кыайыы өрөгөйүн биллигит, илиигитигэр кубок туттугут?

– “Я-волонтер” диэн тиэмэҕэ, коучинг технологиянан “Мировое кафе” маастар-кылаас ыытыллыбыта. Тиэмэлэри биэрбиттэрэ. Коляҕа “Трудовая атака”, Дьулуурга “Чөл олох”, Валентиннаах Никитаҕа “Оҕолор волонтерга тоҕо киириэхтэрин баҕарбаттарый?”диэн тиэмэлэр түбэспиттэрэ. Сорукпут – элбэх оҕо санаатын истии, уопут хомуйуу, проблеманы таһаарыы, ырытыы этэ. Биһиги ону көхтөөхтүк толорон, боппуруостары барытын быһаарбыппыт. Түмүгэр, “Лучший мастер-класс” номинацияны биэрбиттэрэ.

– Бэркэ үлэлээбиккит. Хамаанданан үлэ диэни эрдэттэн билбит дьон сөпкө дьаһаннаххыт дии. Барыаххыт иннинэ манна олорон, таба муоһуттан кыракый сувенирдары оҥорбуккут дии. Олору кимиэхэ биэрдигит?

-- Биһиги тыйыс тымныылаах, таба кыыллаах хоту дойдубут символын куруук туттабыт. Табабыт символа биһиги төрөөбүт дойдубутун таптыырбытын көрдөрөр. Ол иһин, киэн туттан туран бэлэхтээччибит. Ыыппыт маастар-кылааспытыгар көхтөөхиүк кыттыбыт, ыйытыыларга хардарбыт оҕолорго уонна баһаатайбытыгар туттарбыппыт. Харысхалбытын наһаа сөбүлээбиттэрэ. Өссө таҥаспытын -- эбэҥкилии оһуордаах бастыҥабытын, хаалтыспытын сэҥээрбиттэрэ.

– Ыраах бара сылдьан өссө туох үлэни ыыттыгыт, уонна волонтерскай хамсааһыҥҥыт туһунан кэпсиэххит дуо?

– Визитка кэпсээбиппит. Өссө волонтерскай хамсааһыҥҥа бэйэбит бырайыакпытын билиһиннэрбиппит, үлэбитин кэпсээбиппит. Холобур, 2020 сылтан кылааһынан үтүө санааланыы хамсааһыныгар кыттан, муус ылан, ыалларга тиэйэбит. Сорохторго муус уурар лаабыһы оҥорбуппут. Нэһилиэк иһигэр ыытыллар муус ылыы күрэҕэр кыттааччыбыт, сороҕор буурҕа буолан оскуолабыт хаарынан тибиллээччи, ону ыраастыыбыт. Икки сыл буолла үтүө дьыаланан дьарыктаммыппыт. Аан бастаан, биир күн муус ылылларын истэн, сүбэлэһэн баран, көмөлөһүөххэ диэн кылааспыт салайааччытыгар Альбина Ивановнаҕа эппиппит, ону дириэктэрбит Иван Евгеньевич өйөөбүтэ. Оскуола үлэһиттэрин кытары муус ылбыппыт, тиэйбиппит. Хамсааһыммыт аатын “Прицеп добра” диэн ааттаабыппыт.

– Уолаттар, сэргэх кэпсээҥҥит иһин махтал. Түмүккэ ыйытыым эрэ, волонтерскай хамсааһын диэни хайдах өйдүүгүтүй уонна ону хантан билэҥҥит, хамсанан барбыккытый?

– «Волонтер” диэн бэйэ баҕа өртүнэн үтүөнү оҥоруу диэн өйдүүбүт. Үтүөнү оҥорууну биһиги убайдарбытыттан үөрэммиппит. Кинилэр дьоҥҥо элбэх туһалааҕы оҥорбуттарын билэбит, кыра эрдэхпититтэн көрөн улааппыппыт. Оттон бэйэбит улаатан, сатыыр буолбуппутугар баҕа санаабытын олоххо киллэрбиппит. Үтүөнү, үчүгэйи оҥорор үчүгэйэ биллэр. Өссө да оҥоруохпут. Холобура, үтүө бырайыагы оҥороммут бу баран кэллэхпит дии. Иннибитигэр өссө да араас үтүө хамсааһыннар буолуохтара дии саныыбыт. Бу баран кэлбиппитигэр айаммыт ороскуотун үбүлээбит улууспут баһылыга Л.С. Ивановаҕа, улуустааҕы үөрэх управлениетын начальнига М.Х. Ивановаҕа, бэлэмнээбит учууталларбытыгар, иитэр үлэҕэ дириэктэри солбуйааччы Дария Иннокентьевнаҕа, кылааспыт салайааччытыгар Альбина Ивановнаҕа, дириэктэрбитигэр Иван Евгеньевичка улахан махталбытын тиэрдэбит.

Дьэ бу курдук, ыраах Өлөөн сириттэн маннык ис хоһоонноох үтүө хамсааһыннарга аан бастакы суолу арыйан кыттыбыт, үтүө санаалаах уолаттарбытыгар инникитин ситиһиилэри баҕарыаҕыҥ. Үтүө санаалара симэлийэн хаалбакка, олох киэҥ суолугар үчүгэйи эрэ үксэтин, норуокка, төрөөбүт дойдуларыгар туһалаах дьон буоллуннар диэн алгыаҕыҥ!

Билигин үтүө санаалаах уолаттар, үлэҕэ үөрэтэр, илдьэ сылдьар, куруук сүбэлиир оскуола суоппара И.В. Тарбаховтыын үтүө дьыалаларын салҕаан, анал байыаннай дьайыыга сылдьар икки уол ийэтигэр, оскуолабыт учуутала Е.С. Тихоноваҕа иккиһин муус киллэрдилэр. Даҕатан эттэххэ, Саян уонна Сахайаан Тихоновтар Аҕа дойдуларын чиэстээхтик көмүскүү сылдьаллара биһиэхэ холобур, чиэс-бочуот буолар.