Төрүт сокуоҥҥа куоластааһын күнүгэр – от ыйын 1 күнүгэр диэри – баара-суоҕа 2 нэдиэлэ хаалла. Өрөспүүбүлүкэ бары быыбардыыр учаастактара бу уһулуччу суолталаах тэрээһиҥҥэ күүскэ бэлэмнэнэллэр. Биллэн туран, сүрүн болҕомто эпидемиологическай ирдэбиллэргэ ууруллар.
Быыбар кэмигэр быыбардааччылар “хоруонаҕа” сутуллубаттарын туһугар, хамыыһыйа үлэһиттэрин уонна быыбардыы кэлэр дьону барыларын бэйэни харыстанар сириэстэбэлэринэн хааччыйыахтара.
Санатан аһардахха, бэйэни харыстанар сириэстэбэлэринэн хааччыйарга СӨ бырабыытылыстыбатын дьаһалынан Саха Өрөспүүбүлүкэтин хаһаас пуондатыттан эбии бүддьүөт үбэ көрүллүбүтэ. Бу дьаһалы СӨ нэһилиэнньэтин олоҕо-дьаһаҕа көмүскэллээх буолуутун судаарыстыбаннай кэмитиэтэ, Тырааныспар уонна суол-иис хаһаайыстыбатын министиэристибэтэ, СӨ Киин быыбардыыр хамыыһыйата олоххо киллэрэллэр.
– Бүгүҥҥү туругунан, 24 улууһу уонна киин куораты биирдэ кэтиллэр мааскаларынан, бэрчээккэлэринэн, халааттарынан, ыраахтан туран мээрэйдиир термометрдарынан, антисептиктарынан, сирэй хаххаларынан хайыы үйэ хааччыйдыбыт, – диэн СӨ нэһилиэнньэтин олоҕо-дьаһаҕа көмүскэллээх буолуутун судаарыстыбаннай кэмитиэтин салайааччытын солбуйааччы Дмитрий Метсников иһитиннэрдэ.
-
0
-
0
-
0
-
0
-
0
-
0
