Ааспыт нэдиэлэҕэ Ан-26 хоту улуустарга көтүүлэри оҥорбут. Оттон Росгидромет көтөр аала Алдан оройуонун сиригэр-уотугар ландшафтнай баһаардары умуруорууга үлэлээбит.
Бу зондировщик-сѳмѳлүѳттэр от ыйа Бүлүү бѳлѳх улуустарыгар элбэх ардахтаах буолбутугар сыhыаннара суохтар. Ол туhунан «Ньурба» хаhыат телеграм-ханаалыгар суруйар.
Оттуур ходуһалар сааскы ууттан ситэ босхолоно иликтэринэ эбии ардаан, элбэх сир уу анныгар сытарын Ньурба улууhун олохтоохторо этэллэр. Искусственнай ардаҕы түһэрэннэр, бу сайын ардах тохтообокко түстэ диэн кэпсэтиилэр кытта тахсаллар.
Онуоха Ньурбатааҕы нэhилиэнньэ олоҕун хааччыйар сулууспа салайааччыта Афанасий Кириллин: — Бэс ыйын бастакы декадатыттан Бүлүү бөлөх улуустарыгар искусственнай ардаҕы түһэрии үлэтэ ыытылла илик. Ньурба улууhугар билигин сир үксэ инчэҕэй сытар, Маалыкай түбэтигэр үрэхтэр массыына суолун быһа сүүрэн, сырыы хааччахтанан турар. Онон зондировщик-сөмөлүөттэри ыҥырар наадабыт суох. Зондировщик-сөмөлүөт ардаҕы аҕалан түһэрбэт, кини баар былыт ардаҕын күүһүрдэн эрэ биэрэр кыахтаах. Билигин тохтообокко түһэр ардах хотугулуу-арҕааттан, ол эбэтэр, Красноярскай кыраай өттүттэн кэлэр циклон сабыдыала. Зондировщик бу күннэргэ Халыма улуустарыгар, Өймөкөөҥҥө, Уус-Майаҕа уонна Алдан, Нерюнгри диэки ойуур баһаара элбэх сирдэригэр үлэлээбитэ. Ол биһиги улууспутугар дьайбат, — диэн быhаарда.
Хаартыска аhаҕас источниктан ылылынна.
-
0
-
0
-
0
-
0
-
0
-
0
