Түөрт атахтаах доҕорбут – ыт барахсан – былыр-былыргыттан киһи аймахха дьиэҕэ-уокка, бултка-алтка бэриниилээхтик сулууспалаан кэллэҕэ.
Ол да буоллар ыт, бэйэтин айылҕатынан ардай аһыылаах кыыл, мөкү өрүтэ эмиэ баар. Мэнээк, көрүүтэ-истиитэ суох сылдьар дьорҕоот, ытырыык ыттар ордук кыаммат кырдьаҕас дьоҥҥо, оҕолорго кутталлаахтар.
Ол курдук, соторутааҕыта, балаҕан ыйын 3 күнүгэр, Ньурба улууһун Маалыкайыгар бэйдиэ сылдьар ыт быйыл оскуолаҕа саҥа киирбит, аҕыс саастаах кырачаан кыыһы ытырда. Түмүгэр оҕо эчэйэн, улахан шок ылан, балыыһаҕа сытан эмтэнэргэ күһэлиннэ. Кэлин биллибитинэн, ытырыык ыт эрдэ баайыыга сыппыт эбит. Оттон хайа эрэ кэмҥэ босхо баран, уулуссаҕа оонньуу сылдьар оҕоҕо саба түспүт, хас да сиринэн бааһырдыбыт, төбөтүн хайа тардыбыт.
Бу чахчыны Ньурба улууһун борокуратуурата бэрэбиэркэлээтэ. Ол быһыытынан, суукка ытырыык ыт хаһаайыныттан 100 тыһ. солкуобайы эмсэҕэлэнээччигэ төлөтөр туһунан ирдэбил түһэрилиннэ.
Хаартыска аһаҕас источниктан ылылынна.
-
0
-
0
-
0
-
0
-
0
-
0
