Ол курдук, "Бастыҥнар хамсааһыннарын" ахтыбыыстара Ийэ тыл, сурук-бичик күнүгэр аналлаах кылаас чааһын ыыттылар.
Үөрэх кэнниттэн Аал Луук маһы тула оһуокайдаан ньиргиттибит. Оһуокайы ускуустуба оскуолатын фольклорга учуутала Айаал Багынанов, 7 кылаас үөрэнээччитэ Женя Антоева таһаардылар.
Онтон үөрүүлээх тэрээһини Яна Гузаирова, Миша Спиридонов салайан ыыттылар. Учуутал Айаал Багынанов бу күн саха хомуһун аар-саарга таһаарбыт Лука Турнин төрөөбүт күнэ буоларын иһитиннэрэн туран, ырыа доҕуһуоллаах хомуска оонньоото.
Тэрээһин иккис чааһыгар үгэс быһыытынан, киэн туттар биир дойдулаахпыт Н.Е.Мординов-Амма Аччыгыйа "Сааскы кэм" арамааныттан быһа тардан, инценировкалары көрүү буолла.
Ол кэнниттэн "Алгыһынан саҕаламмыт төрөөбүт литэрэтиирэм 125 сыла" ТОК оонньууну саха тылын учуутала Валентина Семеновна Кривошапкина тэрийэн оонньотто. 8-10 диэри кылаас үөрэнээччилэрэ "Амма Аччыгыйын сиэннэрэ" уонна "Сааскы кэм ыччаттара" диэн икки хамаандаҕа арахсаммыт бэрт көхтөөхтүк оонньоотубут, араас боппуруостарга эппиэттээммит күрэхтэстибит. "Амма Аччыгыйын сиэннэрэ" хамаанда түс киһибит Айсен Бястинов, онтон "Сааскы кэм ыччаттара" түс киһилэрэ Миша Спиридонов.
Түмүккэ 1-кы миэстэни "Сааскы кэм ыччаттара" ыллылар, 2-с миэстэҕэ "Амма Аччыгыйын сиэннэрэ" таҕыстылар.
Оҕо төрөөбүт литэрэтиирэтин төһө билэрин, өйдүүрүн көрдөрөр уонна өйүн сайыннарар оонььуну оҕолор наһаа астыннылар уонна сөбүлээтилэр.
Оскуолабытыгар, сарсыардаттан учууталбыт Варвара Павловна Трофимова тэрийиитинэн учууталларбыт киириигэ алгыстаах алаадьынан айах тутан көрсүөхтэриттэн ыла, олус сэргэх, үчүгэй күн ааста.
Ийэ тылбытын харыстыаҕыҥ, сахалыы уус-уран литэрэтиирэни ааҕан сайдыаҕыҥ!
Таисия АНДРЕЕВА,
Харбалаахтааҕы үөрэхтээһин холбоһугун 8 кылааһын үөрэнээччитэ
-
0
-
0
-
0
-
0
-
0
-
0
