Сабыыс саҥа сиртэн өндөйбүт, ньуолах түүнэн бүрүллүбүт ньургуһунчаан уолуйбут, олус куттаммыт саҥата тыҥкынаата: «Сабыс-саҥа саҥа күҥҥэ тардыһан, харахпын аһаммын, халлаан диэкки тардыһан, үрүҥ күҥҥэ сүгүрүйэн үрдүү үүнэн истэхпинэ, чуо хааман кэлэннэр хаһыытаппытынан туура тардан ыланнар, амырыын утаҕынан тумнары кутаннар, эмп-томп оҥостон төрүү иликпиттэн түҥнэри төлкөлөөтүлэр», -- диэн иэйэр-куойар эбит.
Ситэн-хотон силигилээбит, кэрэчээн күлүгүн күҥҥэ көөчүктүү турбут ньургуһун ыксаабыт тиһэх кыланыытын истэн эрэ хааллым: «Аай-аайбын, абытайын эбитин! Бу кырасыабай кыргыттар кынталдьыһан кэлэннэр, кэрэ бэйэбин бэйэлэригэр ханыылыы көрөннөр, туура тардан ыланнар түөстэригэр иилиннилэр, суһуохтарыгар кыбыттылар, сөрүү эрийэннэр төгүрүк ии оҥостон киэргэнэ түһээт ыраах киэр элиттилэр. Доҕотторум барахсаттар, быраһаайдарыҥ», -- диэн иэйэр-куойар саҥата уостан сүтэн хаалла.
Ол быыһыгар сүрдээҕин үөрбүт, сүөм үрдээбит курдук санаммыт чабыланар саҥалар эмиэ охсуллан ааһаллар: «Дьэ, дуу доҕоттоор, сиртэн силистээх үүммүт сириттэн харыс да халбарыйбат дииллэрэ суос сымыйа эбит. Мин бэйэлээҕи таптыы көрөннөр, сэрэнэн суулуу тутан ыланнар, нарын уостарынан уураан, сылаас иэдэстэринэн сигэнэн, сүрэхтэригэр бигээн күлүмүрдэс уорукка аҕаланнар, сандалы үрдүгэр кэрэ курустаал иһиккэ киэргэл буолан тураммын, дьиэм олохтоохторун харахтарын манньытабын, сүргэлэрин көтөҕөбүн. Кэлэ-бара, аттыбынан ааһан иһэннэр ымманыйа таптыыллар». Оо, барахсан, силиһэ суох котоку, сотору кэминэн кууран-хатан , таммалаан бөх кутар иһит диэки атаарыллыан билээхтээбэт буоллаҕа.
– Сарсыардааҥы күн бастакы сардаҥалара сабыллыбыт төбөчөөммүн таарыйан, күнтэн үөрэн, күннүү күлэн күлүмүрдүү кыыһан турдахпына, кэрэни кэрэхсээчи, үчүгэйтэн үөрээччи оҥостон кэлэн халыҥ холустаҕа хатаан хаалларан үгүс үйэлэргэ кэпсээҥҥэ хаалар кэрэ киэргэл буолабын, -- диэн киэн туттубут, үйэтийбититтэн үөрбүт кэпсээни истэр эчи, үчүгэйин!
– Сорох үтүө доҕоттор сорунан кэлэннэр түөрэн-хаһан ылаллар, тиэргэннэригэр илдьэннэр таптаан харайдахтарына түргэнник тарҕыыбын, сири симиибин, -- диэн дьоһуннаах аҕайдык соругун толорбут, олохтон дьолломмут ньургуһуннар сипсиэрдэрэ кулгааҕы сымнатар.
Онтон сиппит-хоппут, сиэмэтин ыспыт, сирдээҕи олох кэрэтин этинэн- хаанынан билбит, кэлэр кэмнэргэ өссө эбиллэн, кэҥиир-үксүүр кэскиллээх кырдьаҕас ньургуһун кэс тыла маннык эбит: «Айылҕа маанылаабыт Айыы сирин оҕото, бу үүммүт быйаҥнаах буордаах кырыспар, ханыыларбын кытта хараҕы манньытар, сүрэҕи үөрдэр, сандал саас маҥнайгы илдьитэ буолан силигилии ситтэрбиэн, тоҥ буору тобулу үүнэн тахсар дьулуурбунан, тулуурбунан сирдээҕи олоххо холобур буолан , эйэлээх халлаан анныгар, үрүҥ күнтэн үөрэн өссө үгүс сылларга , өрө баран эбиллэн, сири симии турдарбыан!»
Дьэ, бу курдук биһиги күннэтэ көрөр, тэпсэ сылдьар, аттыларынан ааһар оппут-маспыт ыалдьар эттээх, уйан дууһалаах буоларын, үөрүүгэ-көтүүгэ ананан кэлбитин өйдүөххэйиҥ, доҕоттоор!
-
0
-
0
-
0
-
0
-
0
-
0
