Быстахтык ыллахха, докумуоҥҥа тимир көлөҕө ирдэбил чуолкайданар. Холобур, оҕолору тиэйэр оптуобус курунан сэбилэммит буолара булгуччулаах. Оҕолору тиэйэргэ кэлиҥҥи икки сылтан “D” категориялаах суоппарынан сылтан итэҕэһэ суох үлэлээбит дьон эрэ көҥүл ылаллар. Сэттэлэригэр диэри саастаах оҕолор түөрт чаастан ордук уһуннук айанныыллара көҥүллэммэт. Өскөтүн оҕолору биир-икки оптуобус тиэйэр буоллаҕына, ГАИ тэрилтэтигэр эрдэ биллэриллиэхтээх, оттон үс уонна онтон элбэх оптуобус айаҥҥа турунар түбэлтэтигэр ГАИ массыыналара арыаллыылларыгар сайаапка бэриллиэхтээх. Бу туһунан айаны тэрийээччи иһитиннэриэхтээх. Биир нэһилиэнньэлээх пуунтан атын сиргэ айанныырга икки сууккаттан хойутааһына суох, оттон куорат иһинээҕи уонна куорат кытыытынааҕы айаҥҥа 24 чаастан хойутаабакка биллэриллиэхтээх. Айаны тэрийээччи оптуобус ахсын арыаллааччылары аныыр. Өскөтүн бөлөххө 20-тэн тахса оҕо баар буоллаҕына, оптуобус аанын аайы арыаллааччы баар буолуохтаах. Ону тэҥэ айан уһуна 12 чаастан тахсар буоллаҕына, үс уонна онтон элбэх оптуобус туһаныллар итиэннэ бөлөҕү медик арыаллыыра ирдэнэр. Киэһэ 11 чаастан сарсыарда 6 чааска диэри оҕолору вокзалларга, аэропортарга тиэрдии эбэтэр олортон таһаарыы, ону таһынан бүтэһиктээх пууҥҥа эбэтэр айан тардыллар түбэлтэтигэр түүн сынньанар сиргэ тиэрдии көҥүллэнэр. Маныаха киэһэ 11 чаас кэнниттэн айан уһуна 100 км тахсыа суохтаах. Бу уураах күүһүгэр кэлэр сыл тохсунньутуттан киириэ уонна 2027 сылга диэри үлэлиэ.
-
0
-
0
-
0
-
0
-
0
-
0
