-Улуу Кыайыы улахан, ыараханан сыананан тиксибитэ, мөлүйүөнүнэн саллаат сырдык тыынын толук уурбута. Сэриигэ айгыраабыт дойдубутун чөлүгэр түһэрэргэ мин Райком хомсомуолугар үлэлээбитим. Оччолорго үлэҕэ дьоруойдуу быһыы диэн баар этэ. 13 сыл тухары Үрдүкү Сэбиэт бүддьүөтү былаанныыр хамыыһыйатын салайбытым, бу үлэ-хамнас хайдах баран иһэрин бэрэбиэркэлиир уорган сүнньүнэн дьокутааттары кытта үлэлиирэ. Үп министиэристибэтэ оройуоннары хайдах хааччыйарын, норуот хаһаайыстыбатын сайдыытын былааннара төһө сөбүн-сыыһатын көрөрбүт.
Үп министиэристибэтигэр Николай Иванович Алексеев, сэрии кыттыылааҕа бэйэтин үлэтигэр бэриниилээхтик, уонунан сылларга уларыйбакка үлэлээбитэ. Кинилэри кытта үлэлиир бэрт чэпчэки буолара. Ол да буоллар, оройуоннарга сыыһаны буллахпытына, сэмэлиирбит ханна барыай? Үлэбит түмүгүнэн Үрдүкү Сэбиэккэ дакылааты оҥорорбут.
Өрөспүүбүлүкэ бары олохтоохторун түгэнинэн туһанан, бар дьоҥҥо эйэлээх олоҕу бэлэхтээбит кэлэн иһэр Улуу Кыайыы 81-сылынан эҕэрдэлиибин! Устуоруйаҕа умнуллубат бырааһынньыктан сэрии алдьархайыттан эмсэҕэлээбит арҕаа дойдулар аккаастаныа суохтаахтар.Арассыыйаны утары туралларын ону тохтотуохха наада. Биһиги ийэ дойдубутун таптыах тустаахпыт, кини туһугар бэриниилээх буолуохтаахпыт. Аҥаардастыы байа сатааһын, мөлүйүөнүнэн харчыны эккирэтии наадата суох дии саныыбын.
Манна даҕатан эттэххэ, Кирилл Егорович Аҕа дойдуну көмүскүүр сэрии I истиэпэннээх уордьанын, Үлэ Кыһыл Знамятын уордьанын кавалера 99 хаарын уулларда, аны сайын 100 сааһын туолуохтаах. Сэбиэскэй Аармыйаҕа 1944 с. ыҥырыллан, Японияны утары Квантунскай аармыйаны үлтү сынньарга кыттыбыта, сэрии кэнниттэн салайар үлэҕэ үлэлээбитэ. Кини Ил Түмэҥҥэ бэтэрээннэри эҕэрдэлиир көрсүһүүгэ кэлэ сылдьан ааспыты санаан, инникини анааран санаатын үллэһиннэ.
Ааптар хаартыскаҕа түһэриитэ.
-
1
-
0
-
0
-
0
-
0
-
0
