Үөрүүлээх күҥҥэ ас-үөл дьаарбаҥката тэриллэн ыытылынна. Манна Төҥүлүттэн “Хоту”, Чурапчыттан “Маарыкчаан” тыа хаһаайыстыбатын аһын-үөлүн оҥорон таһаарар кэпэрэтииптэр, Төҥүлүттэн Маргарита Габышева кэтэх хаһаайыстыбатын, Мооруктан бааһынай хаһаайыстыба салайааччыта Евгений Окороков эмис тыһаҕас этин, Чүүйэттэн Александра, Владислав Смирниковтар саха сүөһүтүн этин, о.д.а. кэлэн удамыр сыанаҕа олохтоох эти, үүтү, арыыны, оҕуруот астарыттан кэнсиэрбэ, бурдук ас арааһын аҕалбыттарын, дьон-сэргэ махталынан хамаҕатык ылла.
Дьоро күҥҥэ өбүгэбит үгэһинэн, саҥа тутууну уруйдаан, саха дьоно үс үйэ тухары ууһуу-тэнийэ туруҥ диэн арчыһыт Зиновий Игнатьев аал уотун аһатта.
Үөрүүлээх күнүнэн улуус баһылыгын тутууга солбуйааччыта Василий Филиппов бар-дьонун эҕэрдэлээтэ. Кини улуус сайдыытыгар кылааттарын киллэрэр сэлиэнньэ олохтоохторугар махтанан туран, бырайыак Манчаары аатынан уулуссаҕа тиийэригэр баҕа санаатын тиэртэ. Василий Валерьевич тутууну ыыппыт “Накатс” ХЭТ үлэһиттэригэр махталын этэн туран, улуус баһылыгын Махтал суругун тэрилтэ генеральнай дириэктэригэр Валерьян Кучутовка туттарда. Итини сэргэ, улуус баһылыгын Махтал суруга “Ытарҕалаах» бульвар” бырайыак бастакы түһүмэҕин куоластааһыныгар көхтөөхтүк кыттан саамай элбэх дьону куоластаппыт В.П.Ларионов аатынан орто оскуола 11-с “б” кылааһын оҕолоругар Лилияна Слепцоваҕа (405), Гирьяна Павловаҕа (208), Вилена Цыпандинаҕа (277) үөрүүлээх быһыыга-майгыга туттарылынна.
Майа баһылыгын бастакы солбуйааччыта Дмитрий Игнатьев сонун уонна үйэлээх тутуунан олохтоохтору эҕэрдэлээтэ. Кини олохтоохтор баҕа санааларын олоххо киллэрэргэ сэлиэнньэ хас биирдии киһитэ дьоһун кылаатын киллэрбитигэр истиҥник махтанна. «Арко» тэрилтэ бырайыагынан үлэлии сылдьар “Накатс” ХЭТ үлэһиттэригэр итиэннэ төрөөбүт дойдулара тупсарыгар куоластааһыҥҥа үлэлэспит, 2400 куолаһы ыларга күүс-көмө буолбут волонтердарга дириҥник махтанна. Дмитрий Александрович сэлиэнньэ баһылыгын Махтал суруктарын тэрилтэ генеральнай дириэктэригэр Валерьян Кучутовка, бэдэрээтчит Владимир Копыриҥҥа, сыбаарсык Сергей Егоровка, погрузчик-машинист Мирослав Гоголевка итиэннэ Сайыына Артамоноваҕа, Даяна Ефремоваҕа, Ларион Ефремовка, Андриана Зыковаҕа, Аман Платоновка, Ариан Сергеевка, Нарыйа Сотниковаҕа, Ренат Семеновка, Жанетта Титоваҕа, Сандаара Тобоноваҕа, Таисия Трофимоваҕа, Альберт Пивоваровка уонна үөһээ ааттаммыт үс үөрэнээччилэргэ үөрүүлээхтик туттарда.
Бэлиэ тэрээһин лиэнтэтин Василий Филиппов, Дмитрий Игнатьев уонна Валерьян Кучутов кырыйдылар.
РФ иитиигэ уонна үөрэхтээһиҥҥэ Бочуоттаах үлэһитэ, СӨ үөрэҕириитин туйгуна, СӨ оскуола иннинээҕи үөрэхтээһин ситимин Бочуоттаах бэтэрээнэ, Майатааҕы “Кэнчээри” оҕону сайыннарар киин үрдүкү категориялаах муусукаҕа уһуйааччыта Капиталина Семенова көҕүлээһининэн, 2016 с. “Ытарҕалаах үрэх” бырайыак ситиһиилээхтик үлэлиир. Майа ортотунан ааһар үрүйэчээн туһунан элбэх хоһоон, остуоруйа сурулунна, испэктээк туруорулунна. 2022 с. Капиталина Семенова тылларыгар уонна дьүрүлүгэр ырыа суруллубута, 2023 с. клип уһуллубута. Бүгүҥҥү күҥҥэ «Кэнчээри» оҕону сайыннарар киин “Дуораанчык” ырыатын бөлөҕө бу ырыаны бэлэх уунна.
Надежда Сергеева аныгылыы сахалыы таҥастарынан, Федора Наумова салайааччылаах үһүс көлүөнэ оскуолатын иистэнньэҥнэрин “Ай-Талаан” бөлөҕө, ыытааччы Галина Эверстова сахалыы кыһыҥҥы таҥастарынан үөрүүлээх тэрээһини киэргэттилэр. Ол туһунан Эркээйи хаһыат саайта иһитиннэрэр.
Хаартыска: Эркээйи хаһыат саайта.
-
0
-
0
-
0
-
0
-
0
-
0
