Парламент спикерэ федеральнай кииҥҥэ Аартыка сирин-уотун систиэмэлээхтик өйүүрүн уонна «Хотугу таһаҕаһы тиэрдии туһунан» федеральнай сокуон көдьүүстээхтик үлэлиирин эттэ. Кини Арассыыйа Федерациятын Бэрэсидьиэнэ Владимир Путин сорудахтарын толорууга өрөспүүбүлүкэҕэ бэриллэр казначейскай кирэдьииттэр кээмэйдэрэ биллэрдик улааппытын бэлиэтээтэ.
Алексей Еремеев логистика систиэмэтэ табыллан үлэлииригэр мэһэйдиир быраап уонна үп боппуруостарыгар болҕомтону уурда:
«Казначейскай кирэдьииттэр биир сылга бэриллэллэр. Ол эрээри Саха Сиригэр таһаҕаһы депонациялааһын (ууран сытыарыы) уустук исхиэмэлээх буолан, уочараттаах навигация кэмигэр Аартыка оройуоннарыгар хотугу өрүстэринэн салгыы тиэрдии икки сылы ылар.
Онон биир сыллаах кирэдьииттиир мэхэньиисим хотугу логистика усулуобуйатыгар хайдах да эппиэттээбэт», — диэн быһаарда.
Бу кыһалҕаны быһаарар туһуттан өрөспүүбүлүкэ салалтата судаарыстыбаннай өйөбүл пуорматын уларытары туруорсар:
• бэриллэр үп категориятын уларытан, казначейскай кирэдьииттэн бүддьүөт кирэдьиитигэр көһөрөрү;
• эбэтэр хотугу таһаҕаһы тиэрдии ураты усулуобуйаларын быһаарар уонна казначейскай кирэдьииттэр болдьохторун икки уонна онтон элбэх сылга диэри уһатар анал нуормаламмыт быраап аактатын ылынары.
Алексей Еремеев эрэгийиэн бу туруорсуутун РФ Федерацияҕа Сэбиэтин экэниэмикэ бэлитиикэтигэр кэмитиэтин чилиэннэрэ толору өйөөбүттэрин иһитиннэрдэ.
Саха Сирин бу көҕүлээһинин РФ Тырааныспарга министиэристибэтэ эмиэ өйөөтө.
«Биһиги Арассыыйа үпкэ министиэристибэтэ кыттыылаах федеральнай кииҥҥэ бары өттүнэн сөптөөх нормативнай быһаарыыны оҥорон биэриэхпитин наада. Бу боппуруос судаарыстыбаннай суолтатын өйдүөххэ наада: бүтүн судаарыстыба үрдүнэн хотугу таһаҕас уопсай кээмэйин аҥаара Саха Сиригэр тиксэр», — диэн Ил Түмэн Бэрэссэдээтэлэ быһааран эттэ.
Ил Түмэн пресс-сулууспатын матырыйаалынан. Хаартыска эмиэ онтон.
-
1
-
0
-
0
-
0
-
0
-
0
