Бэҕэһээ Амма улууһун кииниттэн 9 км тэйиччи турар Бөтүҥҥэ нэһилиэк Сэбиэтин дьокутааттарын болдьох иннинээҕи быыбаардара ыытылынна. Саха Сирин Киин быыбардыыр хамыыһыйата биллэрбитинэн, куоластааһыҥҥа 302 киһи кыттыбыт, испиэһэккэ киирбит быыбардааччы ахсааныттан 35,36 % (уопсайа 854 быыбардааччыттан).
Нэһилиэк бу иннинээҕи ыҥырыытын дьокутааттара быһаарбыттарынан, нэһилиэк бэрэстэбиитэллээх уоргана уопсайа 15 дьокутааттаах буолара быһыллыбыт. Онуоха быыбарга 19 хандьыдаат бэйэлэрин туруоруммуттар.
Куоластааһын түмүгүнэн ирдэнэр15 дьокутаат быыбарданна диэн Бөтүҥ учаастактааҕы быыбардыыр хамыыһыйата быһаарбыт. Олохтоох оскуола дириэктэрэ Алексей Никитин муҥутуур элбэх - 178 быыбардааччы (58,94%) куолаһын ылла. Ону тэҥэ дьокутааттарынан Александр Артемьев, Марианна Борисова, Акулина Иванова, Розалия Иванова, Марианна Кырбасова, Дмитрий Левин, Алексей Нестерев, Нина Нестерева, Александр Неустроев, Лена Неустроева, Константин Попов, Анна Яковлева, Галина Яковлева уонна Серафима Яковлева талылыннылар.
Амма улууһун биир улахан нэһилиэгин дьокутааттарын быыбарын хаамыытын Саха Сирин Уопсатсыбаннай палаатата анаабыт дьоно кэтээн көрдүлэр, өрөспүүбүлүкэ Киин быыбардыыр хамыыһыйата бигэргэппитинэн, куоластааһын быыбар сокуонун ирдэбилин тутуһуллан ыытыллыбыт, кэһии тахсыбатах, үҥсүү киирбэтэх. Болдьох иннинэ быыбар ыытыллыбытынан ааҕаллыбыт.
Хаартыска Саха Сирин Киин быыбардыыр хамыыһыйатын саайтыттан.
-
0
-
0
-
0
-
0
-
0
-
0
