Тэрээһини Ил Түмэн физиическэй култуураҕа уонна успуорка сис кэмитиэтин бэрэссэдээтэлэ Георгий Балакшин аһар тылыгар: «Бүгүн биһиги биир дойдулаахпыт Александр Находкин РФ үрдүкү наҕарааданы ылбытын чиэстиир үтүө тэрээһиҥҥэ муһуннубут. Арассыыйа Дьоруойун үрдүкү аатын ылыы бу ураты хорсун, тулууру уонна Ийэ дойдуга бэриниилээх буолууну кэрэһэлиир», — диэн бэлиэтээтэ.
Кини рядовой байыастан саҕалаан разведка начаалынньыгар тиийэ үүммүтэ, ураты хорсуһун иһин үс «Хорсун буолуу» уордьанынан уонна үс «Хорсун быһыы иһин» мэтээлинэн наҕараадаламмыта. 2026 сыл алтынньы 14 күнүгэр Арассыыйа Федерациятын Бэрэсидьиэнин Ыйааҕынан Александр Находкинҥа Арассыыйа Дьоруойун аата иҥэриллибитэ.
СӨ Судаарыстыбаннай Мунньаҕын (Ил Түмэн) билимҥэ уонна үөрэҕириигэ сис кэмитиэтин бэрэссэдээтэлэ Антонина Григорьева тыл этэригэр Александр Находкин чугас аймах дьонун туһунан кэпсээтэ.
«Чусовскойдар аймах Ньурба улууһугар убаастаналлар. Кинилэр устуоруйалара кэрэхсэбиллээх уонна баай ис хоһонноох. Кэрэ айылҕалаах Куочай нэһилиэгиттэн төрүттээхтэр. Чусовскойдар элбэх бэрэстэбиитэллэрэ өрөспүүбүлүкэ уонна дойду устуоруйатыгар бэйэлэрин суолларын-иистэрин хаалларбыт халыҥ аймах буолаллар. Кинилэр өрүү үлэһиттэринэн, хорсуннарынан, киэҥ көрүүлээхтэринэн, билиилээхтэринэн, муударайдарынан биллэллэр. Александр Егорович бу халыҥ аймах сыдьааннарынан буолар. Кини эбэтин улахан убайа -- Александр Николаевич Чусовской — Аҕа дойду Улуу сэриитин кыттыылааҕа. Сэрии кэнниттэн кини оскуола дириэктэринэн таһаарыылаахтык үлэлээбитэ, үөрэнээччилэргэ, ордук тулаайахтарга муударай настаабыннььык буолбута. Иитиллээччилэрэ араас идэлэри баһылаабыттара, кинилэр ортолоругар биллэр лүөччүктэр, геологтар, быраастар, учууталлар, агрономнар, экэнэмиистэр бааллар. Киин сирдэргэ үөрэммит оҕолоро Саха Сирэ уонна Арассыыйа социальнай-экэнэмиичэскэй сайдыытыгар сүүнэ кылааты киллэрбиттэрэ», -- диэтэ кэпсээтэ.
Салгыы Ил Түмэн олохтоох бэйэни салайыныыга сис кэмитиэтин бэрэссэдээтэлэ Владимир Прокопьев, Ил Түмэн доруобуйа харыстабылыгар сис кэмитиэтин бэрэссэдээтэлэ Светлана Давыдова эҕэрдэ тылы эттилэр. Өрөспүүбүлүкэ Ытык сүбэтин чилиэнэ уонна өрөспүүбүлүкэтээҕи бэтэрээннэр сүбэлэрин бэрэссэдээтэлэ Аркадий Саввинов Дьоруой байыаннай сырыытыгар ураты болҕомтону уурда. Кини Кылаабынай разведкаҕа управлениетын подразделениеларыгар сулууспалаабытын, Сирияҕа, Ливияҕа, Соҕуруу Африкаҕа буолбут байыаннай дьайыыларга кыттыбытын кэпсээтэ.
Арассыыйа Дьоруойа Александр Находкин харда этиитигэр дойдубут үрдүк судаарыстыбаннай наҕараадата киниэхэ улахан эппиэтинэһи сүктэрэрин уонна кини байыаннай утумнааһыны салҕыырыгар эбээһинистиирин туһунан бэлиэтээтэ. “Мин бу үрдүк ааты чиэстээхтик илдьэ сылдьыам уонна норуотум туһугар салгыы сулууспалыам”, - диэн эттэ. Көрсүһүү туһунан сиһилии СӨ Ил Түмэнин саайтыгар киирэн ааҕыҥ.
Хаартыска: Василий Кононов түһэриилэрэ.
-
0
-
0
-
0
-
0
-
0
-
0
