Бастакынан көбүөргэ – 65 уонна 97 кг ыйааһыннаахтар күөн көрсөллөр. Онтон 61, 70, 86, 125 кг – алтынньы 30 күнүгэр, 57, 74, 79, 92 кг – алтынньы 31 күннэригэр тусталлар. 57 кг барыта 34 бөҕөс сэрэбиэйи ааспыт диэн dzulurgan.ru суруйар.
Итинтэн үһэ – биһиги бөҕөстөрбүт: Арыйаан Тютрин Беларуссияттан, Владимир Егоров Хотугу Македонияттан, Айаал Белолюбскай Таджикистантан. Бөҕөстөрбүт бары күрэхтэһиини финал 16/1-тэн саҕалыыллар.
Сэрэбиэй түмүгүнэн Арыйаан Тютрин бастаан Муад Чибаны диэн Алжир уолунаан көрсөр буолбут. Онтон салгыы сэрэйдэххэ кыргыз Карачовы кытта көрсүөн сөп эбит. Бөлөҕөр чугас аан дойду чемпиона Чонг Сонг Хан (КНДР) баар. Дьэ, барыта сыыйа биллэн иһиэ…
Атын уолаттарбыт аллараа бөлөххө киирбиттэр. Айаал Белолюбскай дьоппуон Ямата Огаваны кытта киирсэр буолбут. Санатан эттэххэ, бу бөҕөстөр соторутааҕыта Японияҕа түмүктэммит Азия оонньууларыгар боруонса мэтээл иһин киирсэн тураллар. Онно түһүлгэ кыайыыны биһиги бөҕөспүтүгэр тосхойбута. Бу сырыыга дьэ хайдах буолар?
Оттон Владимир Егоров – Россия чемпиона Абубакар Муталиевтыын тустуоҕа. 61 киилэҕэ Австралия чиэһин көмүскүүр Георгий Окороков квалификацияҕа Панамерика чемпионатын финалиһа Калеб Смиты (Пуэрто-Рико) кытта киирсэр.
Бу чемпионакка саха тустуутун кыһатыттан бэһис киһибит – Виктор Рассадин 74 киилэҕэ квалификацияҕа узбек Жавохир Чулибоевы утары тахсыаҕа. Манна даҕатан эттэххэ, бу чемпионакка бастаан-утаа сайаапка быһыытынан Узбекистантан олимпийскай чемпион Разамбек Жамалов кэлиэхтээх этэ да, бүтэһик түгэҥҥэ кини эчэйиитин ситэ оһоруммакка аккаастанан, ити Чулибоев кэлбит.
Чэ, кылгастык, саха бөҕөстөрүн сэрэбиэйдэрин билиһиннэрдэххэ итинник. Ылан көрдөххө, сэрэбиэй үчүгэй диэн этиэххэ сөп. Барыта тустууктартан бэйэлэриттэн тутулуктаах. Этэргэ дылы, бу күҥҥэ, бу чааска ким үчүгэй бэлэмнээх, кыайыыга дьулуурдаах кыайыаҕа. Бэйэбит дьоммутугар ыалдьабыт уонна ситиһиилэри баҕарабыт!
Биһиэннэриттэн бастакынан көбүөргэ бүгүн – алтынньы 30 күнүгэр Георгий Окороков тахсыаҕа. Онтон атын бөҕөстөрбүт субуотаҕа тусталлар. Санатан эттэххэ, чемпионат тосхолун быһыытынан, хапсыһыылар Дьокуускай бириэмэтинэн күнүс 14:30 чаастан саҕаланаллар, киэһэ 20:30 – финалга тахсар иһин киирсиилэр, оттон 22:00 чаастан – мэтээл иһин тустуулар. Киэһээҥҥи тустуулары «күөх экраҥҥа» Матч!Боец канаалга быһа көрүөххэ сөп.
Петр ПАВЛОВ
Хаартыска dzulurgan.ru
-
0
-
0
-
0
-
0
-
0
-
0
