Уопсастыба

Бу күннэргэ улуус-улуус аайы муҥхалар күргүөмнээхтик тэрилиннилэр. Ол “нэһилиэккэ оччону ылбыттар, ол күөлгэ баччаны баспыттар, онно олох да мэлийбиттэр” диэн ис хоһоонноох суруйуулар социальнай ситимнэргэ тарҕаналлар.

Бу күннэргэ Мэҥэ Хаҥалас улууһун Табаҕатыгар 200-чэкэ киһини ыраахтан-чугастан муспут атыыр муҥха буолбут.  Ол туһунан Майа сэлиэнньэтин баһылыга Алексей Неустроев: «Сыл аайы сэтинньигэ Майа сэлиэнньэтигэр олорор аҕам саастаах дьоммутун, уопсастыбынньыктарбытын уонна Анал байыаннай дьайыыга сылдьар уолаттарбыт дьиэ кэргэннэрин түмэ тардан улахан атыыр муҥханы тэрийэр үтүө үгэстэннибит. Быйыл Табаҕа нэһилиэгэр анаан-минээн тахсан муҥхалаатыбыт. Нэһилиэк баһылыга Юрий Порядин уонна олохтоохтор этиибитин ылынан быйылгы муҥханы үрдүк таһымнаахтык тэрийдилэр.
Барыта 200-тэн тахса киһи кытынна. Түөрт муҥханы түһэрэн, көмүс хатырыктааҕы сомсон ыллыбыт. Аҕам саастаах дьоммут барахсаттар тимир көлөлөргө олорон хаалбакка, ураҕас тутан балыгы күрэтиигэ күүскэ нырыылаан, ойбон алларсан, муҥха ситимин сосуһан бары биир киһи курдук күргүөмүнэн үлэлээтилэр. Онтуларыттан бэйэлэрэ олус диэн астыннылар, үөрдүлэр-көттүлэр.
Күн устата сыраласпыт үлэбит үтүө түмүктээх буолбута барыбыт сүргэбитин көтөҕүөн көтөхтө. Күөл Боллох Тойон көмүс хатырыктааҕыттан куду анньан биэрэн, муҥхаҕа кэлбит 200-чэкэ киһи инчэҕэйинэн куул аҥаардыыта соболоох тарҕаста. Маннык тэрээһиннэр хайаан да наадалар. Майалар муҥхалыыр күөлбүт суох. Онон чугастааҕы нэһилиэктэрбит олохтоох дьаһалталара этиибитин ылынан муҥха бырааһынньыгын тэрийэллэрэ махталлаах дьыала. Маннык киэҥ далааһыннаах муҥханы тэрийиигэ өрүү кыттар, көмөлөһөр дьоммутугар ис сүрэхпиттэн махтанабыт», -- диэн кэпсээтэ.

 Хаартыскаҕа Алексей Андреев түһэриилэрэ.