Алтыс төгүлүн Хара нэһилиэгин, «Уодай» сылгы баасатыгар ыытыллар тэрээһиҥҥэ уопсайа 5 оскуолаттан Анал байыаннай дьайыыга кытта сылдьар байыастарбыт дьиэ кэргэттэриттэн, соҕотох ийэлээх 76 уол оҕо кыттыыны ылла.
Сыллата буолар тэрээһин уол оҕону Саха норуотун үтүө үгэһигэр сыһыаран, этэ-сиинэ бөҕүргүүрүгэр, ситэн-хотон хатарыллан дьоһун эр киһи, инникитин ыал эрэнэр эркинэ – аҕа киһи буоларыгар туһаайыллар.
Уолаттар туора турбакка, улахан дьону кытта тэҥҥэ үлэлээн, салгыҥҥа сылдьан, айылҕалыын алтыһан, саҥаны, идэһэни астааһын сиэрин-туомун билэн, илии тутуурдаах, өттүк харалаах үөрэн-көтөн дьиэлээтилэр.
Бу курдук хабааннаах тэрээһин ыытыллара уолаттар инникитин сатабыллара үрдүүрүгэр, үлэни өрө тутан улааталларыгар төрүөт буолар. Оҕолору сылын ахсын норуоппут үтүө үгэһигэр үөрэтэн, убаһаны астыыры ыйан-кэрдэн биэрэр киһибитигэр Аркадий Лукиҥҥа улахан махталбытын биллэрэбит!
Улууспутугар тыа хаһаайыстыбата кэхтибэккэ үүнэрэ-сайдара, ууһуура-кэҥиирэ кэлэр кэнчээри ыччаппытыттан тутулуктаах.
Майа олохтоох дьаһалтата.
Хаартыскаҕа Анастасия Семеновна Павлова түһэриилэрэ.
-
0
-
0
-
0
-
0
-
0
-
0
