Федеральнай сокуон барылын Саха Өрөспүүбүлүкэтин ситэриилээх былааһын уорганнара, билимин үлэһиттэрэ, профсойуустара, үлэ биэрээччилэрэ уонна урбаанньыттара элбэхтик ырытыспыттара, дьүүллэспиттэрэ. Сокуоҥҥа этиилэри киллэрии үлэни Саха Өрөспүүбүлүкэтин үлэҕэ уонна социальнай сайдыыга министиэристибэтэ сүрүннээбитэ.
– Өрөспүүбүлүкэ Ил Дархана хамсык кэмигэр үлэ саҥа көрүҥнэригэр улахан болҕомто уурар. Ол иһигэр, ыраахтан олорон үлэлээһин нормативнай өттүгэр. Ыраахтан олорон үлэлиир үлэһиттэр бырааптарын көмүскүүргэ улахан үлэ оҥоһулунна. Госдума үлэлиир бөлөҕө Саха сирин салалтатын этиилэрин учуоттаата. Онон, ыраахтан олорон үлэлиир үлэһиккэ хотугу төлөбүрдэрэ бүтүннүү федеральнай сокуонунан мэктиэлэнэллэрэ ситиһилиннэ. Ол курдук, дистанционнай үлэ көрүҥэр көспүт үлэһиккэ хамнаһын кыччатар көҥүллэммэт буолуо. Бу Саха сиригэр олус суолталаах балаһыанньа бигэргэннэ, – диэн үлэ миниистирэ Елена Волкова бэлиэтээтэ.
Маны таһынан федеральнай сокуоҥҥа, өскөтүн үлэһит бэйэтин оборудованиетын туһанар буоллаҕына, ол ороскуотун толуйар туһунан балаһыанньа эмиэ киирдэ. Онон сокуон барыла бүтэһиктээхтик ылылларын күүтэбит.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспатын матырыйаалынан.
-
0
-
0
-
0
-
0
-
0
-
0
