Итэҕэл үлэһиттэриттэн Арассыыйа (Верховный шаман) Допчул-оол Кара-оол солбуйааччыта Лэгэн Лэгэнтэй кытынна уонна бэйэтин санаатын үллэһиннэ.
Лэгэнтэй 52 саастаах, идэтинэн юрист, төрдө Мэҥэ Ханалас Бэдьимэтэ. Бу уустук кэмҥэ дьоҥҥо көмө онорор, ийэ айылҕабытын харыстыыр айылҕа быһылааннарын туоратар сорук турар. Лэгэн Лэгэнтэй бу көрсүһүү Мэҥэ сиригэр ыытыллыбыта мээнэҕэ буолбатаҕын аҕынна.
Маны сэргэ биир айылҕаттан айдарыылаах 27 саастаах, бэйэтэ норуот эмчитэбин, алгысчыппын дэнэр үрдүк үөрэхтээх педагог- психолог Юрий Иванов-Баараҕай Бахсы үгүс киһи болҕомтотун тарта. Ыарыы төрдө киһи бэйэтин майгытыттан сигилититтэн, төрдүттэн ууһуттан диирэ оруннаах. Юрий төрдө Кэбээйи Мастааҕа. Эбэтин Сордонноох удаҕаны утумнаабыт киһи буолар. Юрий учууталынан алгысчыты, аартаах артыыһы А.С.Федоровы махтана ааттааччы.
П.В.Ксенофонтов - Ойуур Байбал көҕүлээччи, тэрийээччи киһи быһыытынан лоп бааччы кылгастык инники баҕа санаатын үллэһиннэ. Ордук болҕомтотун мустубут дьон этиитигэр туһаайда. Мэҥэ биир тумус туттар киһитэ Винонуков В.П.- Кыталык Баһылай эр дьон сүр көтөҕүүтүн, оһуокай, үҥкүү, культура иитэр-үөрэтэр суолтатын, билиҥҥи ыччаты кытта бииргэ үлэлииргэ санаатын үллэһиннэ.
Свинобоев М.А. бу иннинэ Томтор (3 Мэлдьэхси) баһылыгынан үлэлээн бэйэтин суолун ииһин хаалларбыт киһи. Кин үлэлиир кэмигэр нэһилиэк толору ититэр систиэмэҕэ холбонно, аны кыһыҥҥы-сайыҥҥы скважина уута ыалларга киирдэ. Итэҕэл, сиэр туом үлэтигэр эмиэ үлэлэспит, тугун ханныгын көрдөрбүт киһи, ол курдук нэһилиэгэр олоҥхо ыһыаҕын тэрийбитэ. Лоомтука оскуолатыгар дириэктэрдии сылдьан сахалыы ыйдарынан, Попова Г.С-Санаайа салайыччылаах өрөспүүбүлүкэтээҕи экспериментальнай оскуоланы салайбыта.
Арчы дьиэтин исписэлииһэ Анна Холмогорова Айыы итэҕэлин бэлиэлэрин өйдөбүлүнэн үгэс сыллааҕы эргиирин анал көрдөрөр кинигэ-босуобуйаларын көрдөрө-көрдөрө кэпсээтэ, дойдутун дьоно үлэлиир-хамсыыр санаалаахтарыттан астынна.
Маны сэргэ эдэр сэнэх уолаттар кэлэн кытыннылар санааларын үллэһиннилэр.
Оттон мин иһитиннэррибэр итэҕэли дьиэ кэргэҥҥэ оҕо төрөөбүт тылын кытта бииргэ иҥэриэххэ, оскуолаҕа төрөппүтү үөрэтиини тэрийиэххэ диэн бэлиэтээтим. Итэҕэлгэ үлэлэһэр дьон майгы-сигили өттүнэн ыраас эрэ буоллаҕына, дьон-сэргэ бэйэ-бэйэтигэр ытыктабыллаахтык сыһыаннаһыаҕа диэтим.
Түмүккэ Олоҥхо дьиэтин директора Иванова Е.Н. бэрт истиҥ кэпсэтии барбытыгар кэлбит дьоҥҥо махтанна. Олоҥхо дьиэтин араас өрүттээх үлэтин билиһиннэрдэ, бииргэ үлэлиир эдэр дьонун дьоҕурдаахтарын, бары биир сыаллаахтарын соруктаахтарын аҕынна, кэлэр да өттүгэр Олоҥхо дьиэтэ аана аһаҕаһын бииргэ үлэлииргэ бэлэмнэрин эттэ.
Мэҥэ Ханалас улууһун баһылыгын 1 солбуйааччы Потапов С.С. бу ыллыктаах кэпсэтии манан эрэ бүппэтин, сыал сорук оностон үлэлииргэ бэлэммит диэтэ.
Тихонов Петр-Тэрчи
-
0
-
0
-
0
-
0
-
0
-
0
